بۇگىن قازاقپارات اگەنتتىگىنىڭ قۇرىلعانىنا - 102 جىل
13 تامىز 10:33

بۇگىن قازاقپارات اگەنتتىگىنىڭ قۇرىلعانىنا - 102 جىل

نۇر- سۇلتان. قازاقپارات - بۇگىن، 13-تامىز كۇنى ەلىمىزدەگى ەڭ كونە مەديارەسۋرستاردىڭ ءبىرى - «قازاقپارات» حالىقارالىق اقپارات اگەنتىگىنە 102 جىل تولىپ وتىر، دەپ حابارلايدى قازاقپارات.

1920 -جىلى العاشقى قازاق اقپارات اگەنتتىگى روستا- نىڭ ورىنبور- تورعاي بولىمشەسى نەگىزىندە قۇرىلدى. اتالمىش قارا شاڭىراقتىڭ قازىرگى يەسى «قازاقپارات» حالىقارالىق اقپارات اگەنتتىگى 2022 -جىلى «قازاقستان رەسپۋبليكاسى پرەزيدەنتىنىڭ تەلەراديوكەشەنى» ك ە ا ق قۇرامىنا قوسىلۋ ارقىلى قايتا قۇرىلدى.

ەسكە سالساق، 1925 -جىلى اگەنتتىكتىڭ اتى قازروست بولىپ وزگەردى. ال 1937 -جىلى «قازتاگ» دەگەن اتپەن قازاق كسر مينيسترلەر كەڭەسىنىڭ قاراۋىنا بەرىلدى. ارادا 60 جىل وتكەندە، ياعني، 1997 -جىلعى قىركۇيەكتىڭ 10 ىندا ق ر پرەزيدەنتىنىڭ №3629 جارلىعىمەن «قازاق اقپارات اگەنتتىگى (ق ا ز ا ا) « رەسپۋبليكالىق قازىنالىق كاسىپورنى بولىپ وزگەرتىلدى.

2002 -جىلعى قاراشانىڭ 8 ىندە ق ر ۇكىمەتىنىڭ №1186 قاۋلىسىنا سايكەس قازااگ نەگىزىندە «قازاق اقپارات اگەنتتىگى» ۇلتتىق كومپانياسى («قازاقپارات» ۇ ك) قۇرىلدى. 2008 -جىلعى شىلدەنىڭ 3-ىندە اگەنتتىك ق ر ۇكىمەتىنىڭ №668 قاۋلىسىنا سايكەس «ارنا مەديا» ۇلتتىق اقپاراتتىق حولدينگى» اكسيونەرلىك قوعامىنىڭ قۇرامىنا كىردى. ال 2012 -جىلعى تامىزدان 2014 -جىلعا دەيىن «قازاقستان» ر ت ر ك» ا ق قۇرامىندا بولدى. 2014 -جىلدىڭ قاڭتارىندا «قازاقپارات» ەلدەگى العاشقى حالىقارالىق اقپارات اگەنتتىگى (ح ا ا ) مارتەبەسىنە يە بولىپ، ءوز تاريحىنىڭ جاڭا كەزەڭىن باستادى. 2020 -جىلى «قازاقپارات» حالىقارالىق اقپارات اگەنتتىگى» ا ق قۇرامىنا «قازكونتەنت» ا ق قوسىلىپ، قايتا قۇرىلدى.

اگەنتتىك عاسىردان استام ۋاقىت بويى ساياسات، ەكونوميكا، ءبىلىم، دەنساۋلىق، سپورت، مادەنيەت جانە قوعام تىنىس- تىرشىلىگى تۋرالى سەنىمدى ءارى جەدەل اقپارات كوزى رەتىندە بەدەلىن مۇلتىكسىز ساقتاپ كەلەدى.

قازاقپارات جاڭالىقتارى قازاق، ورىس، اعىلشىن، قىتاي، وزبەك تىلدەرىندە تاراتىلىپ كەلەدى. سونىمەن قاتار، شەتەلدەگى قانداستارىمىز ءۇشىن جاڭالىقتار لاتىن گرافيكاسىندا جانە توتە جازۋمەن بەرىلەدى.

اتاپ ايتقاندا، 2004 -جىلدىڭ 14-اقپانىندا «قازاقپارات» ۇلتتىق كومپانياسىنىڭ قازاق بولىمشەسى قازاقستاندا العاش رەت لاتىن ءالىپبيى نەگىزىندە مەملەكەتتىك تىلدە جاڭالىقتار تاراتۋدى قولعا الدى. نەگىز رەتىندە اكادەميك ءابدۋالي قايدار دايىنداعان لاتىن گرافيكاسىنىڭ ۇلگىسى الىندى. كەيىننەن وسى نۇسقا ماماندار اراسىندا «قازاقپارات نۇسقاسى» دەپ اتالىپ كەتتى. سونىڭ ارقاسىندا كيريلليتسا قارپىن وقي المايتىن شەتەلدەردەگى وتانداستارىمىز تاريحي وتانىنداعى بولىپ جاتقان وقيعالاردى ءبىلىپ وتىرۋعا مۇمكىندىك الدى.

«قازاقپارات» ح ا ا- نىڭ ورتالىق كەڭسەسى قازاقستاننىڭ استاناسى نۇر- سۇلتان قالاسىندا ورنالاسقان. ەلىمىزدىڭ بارلىق وڭىرلەرىندە اقپارات اگەنتتىگىنىڭ مەنشىكتى تىلشىلەرى جۇمىس ىستەيدى. اگەنتتىكتىڭ رەسەي، قىتاي، تۇركيا، ەۋروپا، ازەربايجان، وزبەكستان، قىرعىزستان جانە يوردانيادا دا مەنشىكتى تىلشىلەرى بار. بۇل ەلىمىزدە جانە الەمدە بولىپ جاتقان جاڭالىقتاردى جەدەل ءارى شىنايى تاراتۋعا مۇمكىندىك بەرەدى.

جاڭالىقتار