الماتى وبلىسىندا قاڭتار وقيعاسىنا قاتىسقانى ۆيدەوعا ءتۇسىپ قالعان 11 ادام ۇستالدى
5 ءساۋىر 20:29

الماتى وبلىسىندا قاڭتار وقيعاسىنا قاتىسقانى ۆيدەوعا ءتۇسىپ قالعان 11 ادام ۇستالدى

تالدىقورعان. قازاقپارات - قاڭتارداعى دۇربەلەڭ كەزىندە بۇلىك شىعارعانداردى الماتى وبلىسىنىڭ پوليتسەيلەرى بەينەجازباعى دالەلدەر ارقىلى جاپپاي ۇستاپ جاتىر.

وسىلايشا ۇيالى تەلەفون كادرلارىنا ءتۇسىپ قالعان 11 كۇدىكتى قاماۋعا الىندى، دەپ حابارلايدى قازاقپارات ءتىلشىسى.

ارنايى ۇستاۋ وپەراتسياسىن الماتى وبلىسىنداعى ۇلتتىق قاۋىپسىزدىك كوميتەتى مەن پوليتسيا قىزمەتكەرلەرى ۇيىمداستىردى.

ولار كۇدىكتىلەردى ءوڭىردىڭ ءار اۋدان، اۋىلدارىندا قولعا تۇسىرگەن. ۇستالعان 11 ادام - 20-39 جاس ارالىعىنداعىلار. قازىر ولاردىڭ ۇستىنەن «جاپپاي تارتىپسىزدىكتى ۇيىمداستىرۋ» بابى بويىنشا قىلمىستىق ءىس قوزعالىپ، تەرگەۋ ءجۇرىپ جاتىر.

وبلىستىڭ پوليتسيا قىزمەتى ارنايى جەدەل ىزدەستىرۋ وپەراتسياسى كەزىندە سارقان اۋدانىندا ۇيىمداسقان قىلمىستىق توپتىڭ ءبىر مۇشەسى دە ۇستالعانىن اتاپ ءوتتى.

دەپارتامەنتتىڭ مالىمەتىنشە، قاڭتارداعى وقيعاعا ول سارقاننان تالدىقورعانعا كەلىپ قاتىسقان. 37 جاستاعى ادامدى ءتىنتۋ كەزىندە ودان ماكاروۆ تاپانشاسى مەن ونىڭ وقتارى، 210 گرام گاشيشقا ۇقساس ءشوپ تاركىلەنگەن.

سارقان اۋدانىنىڭ تۇرعىنى ۇستالعاننان كەيىن ونىڭ تۋىستارى پوليتسيا دەپارتامەنتىنە كەلىپ، تەرگەۋگە كەدەرگى جاساماق بولعان.

«قاڭتارداعى جاپپاي تارتىپسىزدىكتى ۇيىمداستىردى جانە وعان قاتىستى دەگەن 11 كۇدىكتى ۇستالدى. ءتىنتۋ كەزىندە ەكى اڭشى مىلتىعى، كوپتەگەن وق-ءدارى، قۇقىقتىق شارالار كەزىندە قولدانىلاتىن پوليتسيانىڭ ارنايى قۇرالدارى تاركىلەندى. ولار - قالالىق جانە وبلىستىق پوليتسيا عيماراتىنان ۇرلانعان زاتتار»، - دەدى الماتى وبلىستىق پوليتسيا دەپارتامەنتى باسشىسىنىڭ ورىنباسارى ەلدار ابدىكەنوۆ.


جاڭالىقتار