24 ماۋسىم 20:26

جاڭا سپورت اكادەمياسى تالاپكەرلەردى 2022-2023 وقۋ جىلىنا شاقىرادى

نۇر-سۇلتان. قازاقپارات - قازاقستان رەسپۋبليكاسىنىڭ دەنە شىنىقتىرۋ مەن سپورتتى دامىتۋدىڭ 2025-جىلعا دەيىنگى تۇجىرىمداماسى اياسىندا اشىلعان نۇر-سۇلتان قالاسىنىڭ دەنە شىنىقتىرۋ جانە بۇقارالىق سپورت اكادەمياسى 2022-2023 وقۋ جىلىنا قۇجات قابىلداۋدى باستاعانىن حابارلايمىز.

جوعارى وقۋ ورنى «جالپى دامۋدىڭ پاندىك مامانداندىرىلعان مۇعالىمدەرىن دايارلاۋ» ءبىلىم بەرۋ باعدارلامالارى بويىنشا قابىلداۋ جۇرگىزەدى: «ۇلتتىق سپورت تۇرلەرى، سپورت ويىندارى بويىنشا دەنە شىنىقتىرۋ مۇعالىمى مەن جاتتىقتىرۋشىنى دايارلاۋ» جانە «بۇقارالىق دەنە شىنىقتىرۋ-ساۋىقتىرۋ جۇمىسى بويىنشا دەنە شىنىقتىرۋ مۇعالىمى مەن نۇسقاۋشى-ادىسكەردى دايارلاۋ».

بۇگىنگى تاڭدا اكادەمياعا جوعارى ءبىلىمى بار كادرلاردى دايارلاۋعا مەملەكەتتىك ءبىلىم بەرۋ تاپسىرىسىنا ساي ماقساتتى 150 (ءجۇز ەلۋ) گرانت بولىنگەن.

اكادەميادا عىلىمي-ءبىلىم بەرۋ جانە جاتتىعۋ ۇردىستەرىن جۇزەگە اسىرۋ ءۇشىن «QazExpo» اۋماعىندا ورنالاسقان جاڭا زاماناۋي وقۋ-زەرتحانالىق كورپۋسى بار.

ج. ۇشكەمپىروۆ اتىنداعى جەكپە-جەك سارايى، «بارىس ارەنا» كوپفۋنكتسيونالدى مۇز سارايى، «الاۋ» مۇز سارايى جانە «استانا ارەنا» ستاديونى - اكادەميانىڭ تەوريالىق، تاجىريبەلىك جانە وقۋ-جاتتىعۋ ساباقتارىن وتكىزەتىن بازالارى بولىپ تابىلادى. ياعني، ج و و ەلورداداعى سپورت نىساندارىن وقۋ بارىسىندا ءتيىمدى پايدالانباق.

جوعارى وقۋ ورنى ءوز ستۋدەنتتەرىنە جاھاندىق حاباردارلىقتى ارتتىرۋعا، سپورت سالاسىنداعى الەمنىڭ جەتەكشى جوعارى وقۋ ورىندارىندا اكادەميالىق تاجىريبە مەن تاجىريبەلىك داعدىلاردى الۋعا مۇمكىندىك بەرەدى.

بۇل ماقساتتا حالىقارالىق ىنتىماقتاستىق اياسىندا اكادەميا QS Rankings, Times Higher Education, ARWU رەيتينگتەرى بويىنشا «توپ-100» ۋنيۆەرسيتەتتىڭ تىزىمىنە كىرەتىن الەمنىڭ جەتەكشى ۋنيۆەرسيتەتتەرىمەن ارىپتەستىك قارىم-قاتىناس ورناتۋدا.

اكادەميادا باسقا قالالاردان كەلگەن ستۋدەنتتەرگە، پروفەسسور-وقىتۋشىلار قۇرامىنا ارنالعان جاتاقحانا بار ەكەنىن اتاپ وتكەن ءجون.

جاڭالىقتار