قاڭتار وقيعاسى: الماتى وبلىسىندا 384 قىلمىستىق ءىس تىركەلدى
14 اقپان 21:05

قاڭتار وقيعاسى: الماتى وبلىسىندا 384 قىلمىستىق ءىس تىركەلدى

تالدىقورعان. قازاقپارات - قاڭتار وقيعاسى بويىنشا الماتى وبلىسىندا 384 قىلمىستىق ءىس تىركەلدى، - دەپ حابارلايدى قازاقپارات ءتىلشىسى.

الماتى وبلىسىندا قاڭتارداعى جاپپاي تارتىپسىزدىك كەزىندە قاماۋعا الىنعاندارعا زاڭعا قايشى ارەكەتتەرگە بارۋ، ياعني ازاپتاۋ دەرەگى بويىنشا 37 قىلمىستىق ءىس قوزعالىپ تەرگەلۋدە. سونداي-اق تەرگەۋ جانە ۋاقىتشا ۇستاۋ يزولياتورىنان 33 ادام بوساتىلدى. ونىڭ ىشىندە 8 كامەلەتكە تولماعان بالا بار.

جالپى قاڭتار وقيعاسىندا 758 ادام زارداپ شەكتى. ونىڭ 643 ءى پوليتسيا قىزمەتكەرى، 78 ءى اسكەريلەر، 37 ءسى بەيبىت تۇرعىن. 8 عيمارات، 68 كولىك قيراتىلدى، 7 كولىك تولىعىمەن ورتەنىپ كەتتى.

قاڭتار وقيعاسى بويىنشا بارلىعى 384 قىلمىستىق ءىس تىركەلدى. ادام ءولتىرۋ دەرەگى بويىنشا 5 ءىس قوزعالىپ، ءۇش ءىس پوليتسيا دەپارتامەنتىنىڭ وندىرىسىندە. ۇرلىق دەرەگى بويىنشا 158 ءىس تىركەلىپ، 88 ءىس اشىلدى.

وبلىستىق پوليتسيا دەپارتامەنتى مەن قالالىق پوليتسيا باسقارماسى عيماراتىنان 512 قارۋ قولدى بولدى.

«ق ر ق ك 287- بابىنا سايكەس، ەگەردە وزىندە قازىرگى كەزدە زاڭسىز ساقتاعان قارۋدى سول تۇلعا بىزگە ءوز ارەكەتىمەن كەلىپ تاپسىراتىن بولسا، قىلمىستىق جاۋاپكەرشىلىكتەن بوساتىلادى»، - دەدى الماتى وبلىستىق پوليتسيا دەپارتامەنتى تەرگەۋ باسقارماسىنىڭ باستىعى رۋسلان چاراپيەۆ.

جاڭالىقتار