ەلىمىزدىڭ 3 وڭىرىندە تەرروريستىك قاۋىپتىڭ «قىزىل» دەڭگەيى ساقتالادى

نۇر-سۇلتان. قازاقپارات - ەلىمىزدىڭ 2 وبلىسىندا جانە ءبىر قالاسىندا تەرروريستىك قاۋىپتىڭ «قىزىل» دەڭگەيى ساقتالادى، دەپ حابارلايدى رەسپۋبليكالىق تەرروريزمگە قارسى كۇرەس جونىندەگى جەدەل شتابتىڭ باسپا ءسوز قىزمەتى.

قازاقستان رەسپۋبليكاسى پرەزيدەنتىنىڭ 2013-جىلعى 9-تامىزداعى «تەرروريزم اكتىسى قاتەرىنىڭ تۋىنداۋى تۋرالى اقپارات مونيتورينگىنىڭ جانە حالىقتى حاباردار ەتۋدىڭ مەملەكەتتىك جۇيەسىنىڭ ۇيىمداستىرىلۋى مەن جۇمىس ىستەۋ قاعيدالارىن بەكىتۋ تۋرالى» 611№ جارلىعىنىڭ تالاپتارىنا سايكەس تەرروريزمگە قارسى كۇرەس جونىندەگى وبلىستىق جانە قالالىق جەدەل شتابتار باسشىلارىنىڭ شەشىمىمەن 2022-جىلعى 13- قاڭتاردان باستاپ ەلىمىزدىڭ كەلەسى وڭىرلەرىندە تەرروريستىك قاۋىپتىلىكتىڭ ورتاشا («سارى») دەڭگەيى بەلگىلەندى:

- سولتۇستىك قازاقستان وبلىسىندا جانە قاراعاندى وبلىسىنىڭ بالقاش قالاسىندا 14 تاۋلىك مەرزىمگە؛

- پاۆلودار وبلىسىندا 10 تاۋلىككە؛

- اقمولا وبلىسىندا ەرەكشە وكىمگە دەيىن.

2022-جىلعى 14-قاڭتاردان باستاپ باتىس قازاقستان وبلىسىندا تەرروريستىك قاۋىپتىلىكتىڭ ورتاشا «سارى» دەڭگەيى 14 تاۋلىككە ەنگىزىلدى. تەرروريستىك قاۋىپتىلىكتىڭ جوعارى «قىزعىلت سارى» دەڭگەيى ءۇ. ج. 13- قاڭتاردان باستاپ نۇر-سۇلتان قالاسىندا جانە 14- قاڭتاردان باستاپ شىمكەنت قالاسىندا 14 تاۋلىك مەرزىمگە ەنگىزىلدى.

اسا جوعارى «قىزىل» دەڭگەي جامبىل، الماتى وبلىستارىندا جانە الماتى قالاسىندا ساقتالۋدا. اتالعان وڭىرلەردە تەرروريزمگە قارسى وپەراتسيا جالعاسۋدا.