سولتۇستىك قازاقستاندا كاسىپ اشۋعا 430 ميلليون تەڭگە گرانت بەرىلمەك
25 مامىر 16:20

سولتۇستىك قازاقستاندا كاسىپ اشۋعا 430 ميلليون تەڭگە گرانت بەرىلمەك

پەتروپاۆل. قازاقپارات - سولتۇستىك قازاقستان وبلىسىندا بيىل 338 جاسقا كاسىپ اشۋعا جالپى سوماسى 430 ميلليون تەڭگە گرانت بەرىلەدى.

بۇل مۇمكىندىكتى جىل باسىنان بەرى 30 ادام پايدالاندى، دەپ حابارلايدى قازاقپارات ءتىلشىسى. س ق و جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ مالىمەتىنشە، كاسىپكەرلىك سالاسىندا باعىن سىناپ، بيزنەس- يدەياسىن جۇزەگە اسىرىپ كورگىسى كەلەتىن جانە ءوزىن- ءوزى جۇمىسپەن قامتىپ وتىرعان جاستارعا 400 ا ە ك مولشەرىندە گرانت بەرىلەدى.

«بۇل قاراجاتقا ەڭبەك قۇرالىن، ياعني قۇرال- جابدىقتى، تەحنولوگيالىق قوندىرعىلاردى، ءتورت تۇلىك، قۇس ساتىپ الۋعا بولادى. بيىل ءوز ءىسىن اشۋشىلارعا 430 ميلليون تەڭگەنىڭ 338 گرانتى ءبولىندى. ازىرگە تەك 30 ادام عانا بۇل مۇمكىندىكتى پايدالاندى»، - دەيدى باسقارما باسشىسىنىڭ مىندەتىن اتقارۋشى رينات ەلجاسوۆ.

2017-2021 -جىلدار ارالىعىندا «ەڭبەك» باعدارلاماسى اياسىندا س ق و- دا 34 مىڭنان استام جاس جۇمىسپەن قامتىلدى. بيىل بۇل شارا 2021-2025 -جىلدارعا ارنالعان كاسىپكەرلىكتى دامىتۋ ۇلتتىق جوباسى اياسىندا جالعاسادى. ۋنيۆەرسيتەت، كوللەدج جانە 11-سىنىپ تۇلەكتەرىنە باسىمدىق بەرىلەدى.

«جوبا اياسىندا جاستار كاسىبي ءبىلىم الۋعا، الەۋمەتتىك جۇمىس ورىندارىندا تاجىريبە جيناۋ ءۇشىن ەڭبەكتەنۋگە، جاستار تاجىريبەسىنە قاتىسۋعا، باسقا وڭىرلەردەن قونىس اۋدارۋعا جانە ءوز ءىسىن اشۋ ءۇشىن گرانت الۋعا مۇمكىندىكتەرى بار. جىل باسىنان جوباعا 1300 دەن استام جاس قاتىستى، ونىڭ %63 ى - اۋىل تۇرعىندارى»، - دەيدى رينات ەلجاسوۆ.

بيىل جۇمىسسىز جۇرگەن 500 ادام تەگىن العاشقى كاسىپتى مەڭگەرە الادى.

«الەۋمەتتىك جۇمىس ورنىنا 46 ادام ورنالاستىرىلدى. بۇل كومەكتى ۋنيۆەرسيتەت پەن كوللەدجى بىتىرگەنىنە 3 جىل تولا قويماعان جاستار الا الادى. جاستارى 29 دان اسپاۋى كەرەك. ولار ءبىر جىلعا قابىلدانادى، ەڭبەكاقىسى 30 ا ە ك- تەن تومەن بولمايدى. العاشقى جۇمىس ورنى جوباسىنا 188 ادام قابىلداندى. مۇندا دا ءوز تالاپتارى بار، جاسى 29 دان اسپاۋى ءتيىس، بۇعان دەيىن ەش جەردە جۇمىس ىستەمەگەن، تاجىريبەسى جوق ماماندار 1,5 جىلعا جۇمىسقا الىنادى. ەڭبەكاقىسى 30 ا ە ك كەم بولمايدى، جۇمىسپەن قامتۋ ورتالىعى ونىڭ العاشقى جىلىنىڭ ەڭبەكاقىسىنا سۋبسيديا بولەدى. ال، «ۇرپاقتار كەلىسىمشارتى» اياسىندا 28 جاس جۇمىسقا ورنالاستى»، - دەيدى باسقارما باسشىسىنىڭ مىندەتىن اتقارۋشى.

بۇعان دەيىن حابارلانعانىنداي، بارلىق وڭىردە جاستارعا ارنالعان تۇرعىن ءۇي باعدارلاماسى ىسكە قوسىلادى.

جاڭالىقتار