مينيستر ازاماتتاردىڭ زەينەتكە 50 جاسىندادا شىعۋ مۇمكىندىگى بار ەكەنىن ايتتى
26 مامىر 15:00

مينيستر ازاماتتاردىڭ زەينەتكە 50 جاسىندادا شىعۋ مۇمكىندىگى بار ەكەنىن ايتتى

نۇر-سۇلتان. قازاقپارات – ق ر ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا زەينەت جاسىن تومەندەتۋ تۋرالى سۇراقتارعا جاۋاپ بەردى، دەپ حابارلايدى قازاقپارات ءتىلشىسى.

«جالپى زەينەتاقى جۇيەسى تۋرالى ايتىلعان كەزدە سىزدەر ءبىر نارسەنى بىلگەنىڭىز ءجون. ءبىز 1998 -جىلى زەينەتاقى جۇيەسىن رەفورمالادىق. سول رەفورماعا سايكەس، 1998 -جىلدىڭ 1-قاڭتارىنا دەيىن ەڭبەك ءوتىلى بار ازاماتتار عانا مەملەكەتتەن ەڭبەك زەينەتاقىسىن الادى، سودان كەيىن وعان قوسىمشا بازالىق زەينەتاقىنى الادى. ال ەگەر ءبىز زەينەت جاسىن تومەندەتەتىن بولساق، ونسىز دا ەڭبەك ءوتىلى تومەندەپ كەلە جاتىر، زەينەتاقى دا وتە تومەن بولادى»، - دەدى تامارا دۇيسەنوۆا سەناتتا تىلشىلەرگە بەرگەن سۇحباتىندا.

مينيستر ازاماتتاردىڭ زەينەتكە ەرتە شىعۋ مۇمكىندىگى دە بار ەكەنىن ەسكە سالدى.

«سوندىقتان ازاماتتار 1998 -جىلدان كەيىن جيناقتاۋشى زەينەتاقىعا ءوز ۋاقىتىندا قوسىلىپ وتىرسا، جارناسى دۇرىس بولسا، 63 ەمەس، ءتىپتى 50 جاسىندا زەينەتكە شىعىپ كەتۋگە مۇمكىندىگى بار دەپ زاڭدا جازىلىپ قويعان. سوندىقتان دا ازاماتتاردىڭ ەڭ نەگىزگى جۇمىسى - زەينەتاقى جۇيەسىنە ۋاقىتىندا قوسىلىپ، ۋاقىتىندا جارناسىن تولەپ وتىرسا، زەينەتكە ەرتە شىعۋعا تولىق مۇمكىندىگى بار. بۇل ايەلدەر عانا ەمەس، ەر ادامدارعا دا قاتىستى»، - دەدى ەڭبەك ءمينيسترى.

بۇعان دەيىن تامارا دۇيسەنوۆا ەڭ جوعارى جانە تومەنگى زەينەتاقى اراسىنداعى ايىرماشىلىق ازاياتىنىن ايتقان ەدى.

اۆتور: ايجان سەرىكجان قىزى


جاڭالىقتار