ەلىمىزدە جۇمىس ىستەۋگە قۇلىقسىز 51,5 مىڭ ادام بار - ستاتيستيكا
12 تامىز 23:30

ەلىمىزدە جۇمىس ىستەۋگە قۇلىقسىز 51,5 مىڭ ادام بار - ستاتيستيكا

نۇر-سۇلتان. قازاقپارات - قازاقستاندا بوس جۇرسە دە، جۇمىس ىزدەۋگە تالپىنبايتىن 51,5 مىڭ ادام تىركەلگەن.

بۇل تۋرالى ءساۋىر-ماۋسىم ايلارىنىڭ قورتىندىسىن جاريالاعان ۇلتتىق ستاتيستيكا بيۋروسى ءمالىم ەتتى، دەپ حابارلايدى قازاقپارات ءتىلشىسى.

«2022-جىلدىڭ ەكىنشى توقسانىندا ەكونوميكانىڭ ءتۇرلى سالالارى بويىنشا 8,8 ميلليون ادام جۇمىسپەن قامتىلدى. ونىڭ ىشىندە 6,7 ميلليون - جالدامالى قىزمەتكەر، ال 2,1 ميلليون ادام ءوزىن-ءوزى جۇمىسپەن قامتىعان. بۇل - وتكەن جىلدىڭ سايكەس كەزەڭىمەن سالىستىرعاندا 23,1 مىڭ ادامعا كوپ. جۇمىسسىز جۇرسە دە، قىزمەت ىزدەمەگەن نەمەسە جۇمىس ىستەۋگە دايىن ەمەس ادامدار بيىلعى جىلدىڭ I توقسانىمەن سالىستىرعاندا 18,4 پايىزعا ازايدى - 51,5 مىڭ ادام. ونىڭ ىشىندە 15-28 جاستاعىلار اراسىنداعى جۇمىسسىزدىق دەڭگەيى - 3,8 پايىز. ال، NEET ساناتىنداعى جاستار اراسىندا جۇمىسسىزدىق كورسەتكىشى - 6,5 پايىز»، - دەپ ءمالىم ەتتى ۇلتتىق ستاتيستيكا بيۋروسىنان.

بيۋرو دەرەگىنشە، ءساۋىر-ماۋسىم ارالىعىندا ەل بويىنشا 452 مىڭ جۇمىسسىز ادام تىركەلگەن.

ەسكە سالا كەتسەك، بۇعان دەيىن 5 مىڭعا جۋىق ەلوردالىق جۇمىسسىز رەتىندە تىركەۋدە تۇرعانىن حابارلاپ ەدىك.

جاڭالىقتار