قاڭتار وقيعاسى: جاپپاي تارتىپسىزدىك بويىنشا 58 جانە تەرروريزمگە قاتىستى 8 قىلمىستىق ءىس تەرگەلۋدە
30 ماۋسىم 17:29

قاڭتار وقيعاسى: جاپپاي تارتىپسىزدىك بويىنشا 58 جانە تەرروريزمگە قاتىستى 8 قىلمىستىق ءىس تەرگەلۋدە

نۇر-سۇلتان. قازاقپارات - قاڭتارداعى جاپپاي تارتىپسىزدىكتەر بويىنشا 58 جانە تەرروريزم اكتىلەرىمەن 8 قىلمىستىق ءىس بار.

بۇل تۋرالى ق ر باس پروكۋراتۋراسى 1-قىزمەت باستىعىنىڭ ورىنباسارى ەلدوس قيلىمجانوۆ ايتتى، دەپ حابارلايدى قازاقپارات ءتىلشىسى.

«باس پروكۋراتۋرا قاڭتار وقيعالارىنا بايلانىستى قىلمىستىق ىستەردى تەرگەۋ بارىسى تۋرالى حابارلاۋدى جالعاستىرۋدا. قيراتۋلار، مەملەكەتتىك وبەكتىلەردى ورتەۋ، مۇلىكتەردى جويۋ جانە تەرروريزم اكتىلەرى الماتى، شىمكەنت قالالارىندا، اقتوبە، اتىراۋ، الماتى، جامبىل، قىزىلوردا جانە شىعىس قازاقستان وبلىستارىندا جاسالعانى بەلگىلى. سول قايعىلى كۇندەرى قىلمىسكەرلەر اسكەريلەرگە شابۋىل جاساپ، جولدىڭ ءجۇرۋ بولىگىن جاۋىپ، اۆتوكولىكتەردى ورتەپ، ازاماتتاردى تارتىپسىزدىكتەرگە قاتىسۋعا كوندىرگەن جانە توناۋلار جاساعان»، - دەدى ول ورتالىق كوممۋنيكاتسيالار قىزمەتىندەگى بريفينگ بارىسىندا.

ونىڭ اتاپ وتۋىنشە، قوعامدىق قاۋىپسىزدىك پەن قۇقىقتىق ءتارتىپتى قامتاماسىز ەتۋدى بۇعاتتاۋ ءۇشىن ولار پوليتسيا ورگاندارىنىڭ عيماراتتارىنا شابۋىلدار جاسادى.

«بۇگىنگى كۇنى ارنايى پروكۋرورلاردىڭ ءىس جۇرگىزۋىندە جاپپاي تارتىپسىزدىكتەر بويىنشا 58 جانە تەرروريزم اكتىلەرىمەن 8 قىلمىستىق ءىس بار. اياقتالۋىنا قاراي ىستەر سوتقا جولدانۋدا»، - دەدى باس پروكۋراتۋرا وكىلى.

جاڭالىقتار