اسكەرسىز 8 مەملەكەت
27 مامىر 12:30

اسكەرسىز 8 مەملەكەت

نۇر-سۇلتان. قازاقپارات - الەمدە اسكەري قاقتىعىستاردىڭ كولەمى ارتىپ كەلەدى.

الىپ مەملەكەتتەر ءوز اسكەرىنىڭ سانى مەن كۇشى ارقىلى باسەكەگە تۇسسە، كەي مەملەكەتتەر اسكەرسىز- اق ءومىر سۇرۋدە. بۇگىن نازارعا اسكەرى جوق مەملەكەتتەر ءتىزىمىن نازارعا ۇسىنامىز.

1. اندوررا

ەۋروپانىڭ وڭتۇستىك- باتىس ايماعىندا ورنالاسقان مەملەكەتتىڭ 1933 -جىلدان بەرى اسكەرى جوق. مەملەكەتكە شابۋىل جاسالعان جاعدايدا ەكى ءىرى كورشى مەملەكەتتەر فرانسيا مەن يسپانيا قورعاۋعا مىندەتتى. 1993 -جىلى «تاتۋلىق، دوستىق جانە ىنتىماقتاستىق تۋرالى كەلىسىمگە» قول قويعان. تۇراقتى تۇردە ەلدە 12 سارباز قىزمەت ەتەدى، ولاردىڭ قىزمەتى تۋدى سالتاناتتى تۇردە كوتەرۋمەن شەكتەلەدى. كەيبىر مالىمەتتەر بويىنشا، ولاردى ۇستاۋعا قاراجات ەرىكتى قايىرىمدىلىق ارقىلى جينالادى.

2. ۆانۋاتۋ

بۇل ارال مەملەكەتى 1980 -جىلى ۇلىبريتانيادان ءبولىنىپ شىعىپ، ءوز تاۋەلسىزدىگىن الدى. سودان بەرى مەملەكەتتىڭ جەكە اسكەرى جوق. ۆانۋاتۋنىڭ قاۋىپسىزدىگىن پوليتسيا جانە 300 ەرىكتىدەن تۇراتىن «شاعىن ءموبيلدى كۇشتەر» قامتاماسىز ەتەدى. ەرىكتىلەر توبى پوليتسيادان كومەك سۇراۋ قيىن ەلدىڭ شەتكى ارالدارىنداعى ءتارتىپتى ساقتاۋعا كومەكتەسەدى. الايدا 1994 -جىلى ولاردىڭ 50 ى پاپۋا- جاڭا گۆينەياعا بىتىمگەرشىلىك ميسسياسىن ورىنداۋعا جىبەرىلدى.

3. ۆاتيكان

1929 -جىلى جاسالعان لاتەران كەلىسىمدەرىنە سايكەس، ۆاتيكانعا بەيتاراپ مارتەبە بەرىلدى: «ريم پاپاسى حالىقارالىق قاتىناستاردا ماڭگىلىك بەيتاراپ جاقتى ساقتاۋعا جانە بارلىق تاراپتار ارنايى تالاپ ەتپەسە، داۋلارعا قاتىسۋدان باس تارتۋعا ۋادە بەردى». كىشكەنتاي شتاتتاعى ءتارتىپتى جاندارمەريا (پوليتسياعا ۇقساس) باسقارسا، شۆەيتساريالىق گۆارديا ريم پاپاسىنىڭ جەكە قاۋىپسىزدىك جاساعى رەتىندە قىزمەت ەتەدى. ول 1506 -جىلدان بەرى كەلەدى جانە قۇرامىندا 100-گە جۋىق اسكەر بار. سودان كەيىن ريم پاپاسى يۋلي II ەۋروپاداعى ەڭ مىقتى دەپ سانالاتىن شۆەيتساريالىق ساربازدار اسكەرىن قۇردى. ءداستۇر ءالى كۇنگە دەيىن ساقتالعان. گۆاردياشىلار مىندەتتى تۇردە شۆەيتساريا اسكەرگە قىزمەت ەتكەن 19 بەن 30 جاس ارالىعىنداعى كاتوليكتەر بولۋى كەرەك. ءتىپتى ولاردىڭ بويىنا دا قويىلاتىن تالاپ بار: 174 سانتيمەتردەن تومەن بولماۋى كەرەك. ايلىق جالاقىسى شامامەن - €1500.

4. يسلانديا

ورنالاسقان ايماعىنا بايلانىستى يسلانديا ەشقاشان جاۋلاپ الۋ نىسانى بولعان ەمەس. XVIII عاسىردىڭ ەكىنشى جارتىسىندا، ناپولەون سوعىستارى باستالعانعا دەيىن ونداعان جىلدار بۇرىن، ارالدىڭ اسكەرى 1500 -جىلدارداعى ەجەلگى قارۋلارمەن قارۋلانعان بىرنەشە جۇزدەگەن ساربازداردان تۇردى. وسىعان بايلانىستى بريتانيالىقتار 1808 -جىلى يسلانديانى ەش قارسىلىقسىز باسىپ الدى. XIX عاسىردىڭ ورتاسىندا زاماناۋي اسكەر قۇرۋ ويلارى ءساتسىز اياقتالدى. 1940 -جىلى ۇلى بريتانيا نەمىستەردىڭ باسىپ الۋىنا جول بەرمەۋ ءۇشىن ارالعا قايتادان ورنىقتى. ءبىر جىلدان كەيىن بريتانيالىق ساربازدار امەريكالىقتارمەن اۋىستىرىلدى. امەريكا قۇراما شتاتتارى ەكىنشى دۇنيەجۇزىلىك سوعىس اياقتالعاننان كەيىن ەلدەگى گارنيزوندى ساقتاۋدى جالعاستىردى. 1949 -جىلى يسلانديا اسكەرى بولماسا دا ناتو- نىڭ نەگىزىن قالاۋشى مۇشەلەرىنىڭ ءبىرى بولدى. الايدا، جاعالاۋ كۇزەتى 1960 جانە 1970 -جىلدارى سولتۇستىك اتلانتيكادا بالىق اۋلاۋ قۇقىعى ءۇشىن ۇلى بريتانيانىڭ كورولدىك اسكەري- تەڭىز كۇشتەرىمەن بىرنەشە رەت تىكەلەي قاقتىعىسقا تۇسكەن ەدى. بۇل قاقتىعىستار «سايدا سوعىستارى» دەپ اتالدى.

2006 -جىلى ا ق ش اسكەرلەرى يسلانديادان شىعارىلدى. سودان بەرى ارالدا قارۋلى كۇشتەر بولعان جوق، ءبىراق ەل ناتو- نىڭ قامقورلىعىنا الىنعان، سونىمەن قاتار، جاعالاۋ كۇزەتى يسلانديالىق بالىقشىلاردىڭ سولتۇستىك اتلانتيكالىق سۋلاردا سايدا بالىعىن اۋلاۋ قۇقىعىن ءالى كۇنگە دەيىن قورعاۋ ۇستىندە.

5. كوستا-ريكا

1948 -جىلى كوستا- ريكادا جالعان سايلاۋعا بايلانىستى ۇكىمەت پەن وپپوزيتسيالىق كۇشتەر اراسىنداعى ازاماتتىق سوعىس 44 كۇن بويى بولعان. بۇل ەل تاريحىنداعى ⅩⅩ عاسىرداعى ەڭ قاندى وقيعا بولدى. كوتەرىلىسشىلەر جەڭىسكە جەتتى، ونىڭ جەتەكشىسى حوسە فيگەرەس فەررەر پرەزيدەنت بولدى. ول اسكەردى تاراتىپ، ونى قايتا قۇرۋعا تىيىم سالدى. سودان بەرى، ورتالىق امەريكاداعى كورشىلەرىنەن ايىرماشىلىعى، كوستا- ريكا بەيبىت جانە زايىرلى پارلامەنتتىك دەموكراتيا رەتىندە دامىدى. مەملەكەت تۇراقتى تۇردە حالىقارالىق باقىت يندەكسىنىڭ العاشقى جيىرما ەلدىڭ تىزىمىنە كىرەدى. ەل پرەزيدەنتى جانە نوبەل سىيلىعىنىڭ يەگەرى وسكار ارياس سانچەس ايتقانداي: «قاقتىعىستاردى اسكەري جولمەن شەشۋ سوڭعى شارا بولۋى كەرەك. ءبىز ءارقاشان كەلىسسوزدەر ۇستەلىندە شەشىم جولىن تابامىز».

6. ليحتەنشتەين

ەۋروپانىڭ ورتالىعىنداعى بۇل شاعىن مەملەكەتتىڭ 1866 -جىلدان بەرى اسكەرى جوق. اۋسترو- پرۋسسيا- يتاليا سوعىسى كەزىندە ىقتيمال شابۋىلدان قورعاۋ ءۇشىن ەلدىڭ وڭتۇستىك شەكاراسىنا 80 ادامدىق گارنيزون جىبەرىلدى. تاريحشىلاردىڭ ايتۋىنشا، «ولاردىڭ تاۋ پەيزاجىنان ءلاززات الۋدان، شاراپ پەن سىرا ىشۋدەن جانە كۇنى بويى تۇتىكشەلەردى تارتۋدان قولدارى بوساماعان». ونىڭ ۇستىنە، جەتى اپتادان كەيىن سوعىس اياقتالعاندا، ليحتەنشتەيننىڭ «اسكەرى» كەتكەندەگى سانىنان ارتىلىپ ورالدى. وعان اۋستريالىق وفيتسەرلەردىڭ ءبىرى قوسىلعان. وسى وقيعادان كەيىن ەل پارلامەنتى مۇمكىندىكتى پايدالانىپ، اسكەردى تاراتۋعا داۋىس بەردى. باستى سەبەپ رەتىندە ماقساتسىز شىعىندار اتالدى. قازىر ليحتەنشتەيندە كورشىلەس اۋستريا مەن شۆەيتساريانىڭ اسكەرىمەن تىعىز بايلانىستا جۇمىس ىستەيتىن پوليتسيا قىزمەتى عانا بار.

7. مارشالل ارالدارى، ميكرونەزيا، پالاۋ

تىنىق مۇحيتىنىڭ ورتاسىندا ورنالاسقان وسى ءۇش شاعىن ارال- مەملەكەت 1980 -جىلدارى ا ق ش- پەن «ەركىن بىرلەستىك تۋرالى كەلىسىمگە» قول قويدى. امەريكا قۇراما شتاتتارى ولاردىڭ قاۋىپسىزدىگىن قامتاماسىز ەتەدى. سوندىقتان پالاۋ، ميكرونەزيا جانە مارشالل ارالدارىندا اسكەرلەر جوق. ىشكى ءتارتىپتى پوليتسيا مەن جاعالاۋ كۇزەتى قامتاماسىز ەتەدى.

8. پاناما

پاناما اسكەرى 1903 -جىلى ەل كولۋمبيادان تاۋەلسىزدىك العان كەزدە پايدا بولدى. كەلەسى 87 جىل اسكەري توڭكەرىستەردى، ديكتاتۋرالاردى جانە امەريكالىق باسقىنشىلىقتى باقىلاۋدا ۇستاۋمەن بولدى. اقىرىندا، 1990 -جىلى اقپاندا شتات پارلامەنتى تۇراقتى اسكەري قۇرۋعا تىيىم سالاتىن كونستيتۋتسياعا وزگەرتۋلەر ەنگىزدى. سودان بەرى پانامانى پوليتسيا، شەكاراشىلار جانە باسقا دا قۇقىق قورعاۋ ورگاندارى كۇزەتەدى.



اقپارات دەرەككوزى: massaget.kz

جاڭالىقتار