+7 (701) 759 90 19
17 °С : نۇر-سۇلتان
23 °С : الماتى
USD 428.05 EUR 501.2
RUB 5.47 CNY 63.87
جاڭالىقتار

ۇلت ۇستازى اتىنداعى بايقاۋ مارەگە جەتتى

19 قىركۇيەك 11:38
:ءبولىسۋ
ۇلت ۇستازى اتىنداعى بايقاۋ مارەگە جەتتى

نۇر-سۇلتان. قازاقپارات - ق ر مادەنيەت جانە سپورت مينيسترلىگى ءتىل ساياساتى كوميتەتى ۇيىمداستىرعان وقىتۋشىلاردىڭ ا. بايتۇرسىن ۇلى اتىنداعى رەسپۋبليكالىق ونلاين بايقاۋى ءوز مارەسىنە جەتتى، دەپ حابارلايدى قازاقپارات.

ءداستۇرلى بايقاۋ بيىل نەسىمەن ەرەكشەلەندى؟ قانداي جاڭاشىل وقىتۋ ادىستەرى كورىنىس تاپتى؟ مىنە، كوپ كوكەيىندەگى سۇراقتىڭ جاۋابى تابىلار ءسات تە كەلىپ جەتتى. ءتىل ساياساتى كوميتەتىنىڭ ءتوراعاسى ادىلبەك قابا بايقاۋدىڭ اشىلۋ سالتاناتىندا قۇتتىقتاۋ ءسوز سويلەپ، مەملەكەتتىك ءتىلدى وقىتۋ ماسەلەسىنە ايرىقشا كوڭىل ءبولدى.

«ءبىزدىڭ ورتالىقتار جىل سايىن 39 مىڭنان استام ەرەسەك ادامدارعا قازاق ءتىلىن ۇيرەتەدى. بۇل ءبىر قاراعاندا از سيفر بولماعانىمەن، قازاق ءتىلىن كۇندەلىكتى تۇرمىس قۇرالىنا اينالدىرىپ سويلەپ كەتكەندەر سانىنا شاققاندا، كوڭىل كونشىتپەيدى. نەگە؟ بالكىم، ءتىل ۇيرەتۋ ءتاسىلىمىز ۋاقىت تالابىنا جاۋاپ بەرە الماي جۇرگەن شىعار؟! الدە تاجىريبە مەن ءادىس-تاسىلدەرىمىز جەتكىلىكسىز بە؟ اتقارىلىپ جاتقان قىرۋار شارۋانى بەكەرگە شىعارۋ ماقسات ەمەس، دەگەنمەن، سۇراق كوپ، جاۋاپ از. بۇعان قوعام دا بەلسەنە اتسالىسۋى كەرەك. كەيدە «تىلگە قاجەتتىلىك» دەگەن ماسەلەنى ءجيى ايتامىز دا، سول قاجەتتىلىكتى تۋدىرۋشى ءوزىمىز ەكەنىن ەستەن شىعارىپ الا بەرەمىز. ۇلت ۇستازى احمەت بايتۇرسىن ۇلىنىڭ ءتىل ۇيرەتۋدەگى وشپەس مۇرالارىن جالعاستىرۋ پارىزىمىز. ساپالى وقىتۋ دەگەنىمىز، سايىپ كەلگەندە، ۇلى عالىم يدەيالارى مەن ءتىل ۇيرەتۋدەگى ءادىس-تاسىلدەرىن ۇيلەسىمدى قولدانۋعا اكەپ سايادى. بۇل شارا وڭىرلەردە مەملەكەتتىك ءتىلدى وقىتۋمەن اينالىسىپ جۇرگەن ادىسكەر ماماندار مەن وقىتۋشىلاردىڭ ءوزارا تاجىريبە الماسىپ، ادىستەمەلىك بىلىكتىلىكتەرىن شىڭداپ، وزىق تاجىريبەنى كەڭىنەن تاراتۋدى كوزدەيدى»، - دەدى ول.

رەسپۋبليكالىق بايقاۋ ءتورت كەزەڭنەن تۇردى. العاشقى كەزەڭدە قاتىسۋشىلار قازاق ءتىلىنىڭ ا1 دەڭگەيىنە ارنالعان ون بەس مينۋتتىق بەينەساباق ۇلگىسىن كورسەتىپ، ا. بايتۇرسىن ۇلىنىڭ ادىستەمەلىك يدەيالارى مەن يننوۆاتسيالىق ءادىس-تاسىلدەردى شەبەر قولدانۋعا تىرىستى. كەلەسى كەزەڭ ا. بايتۇرسىن ۇلىنىڭ ءومىرى، قىزمەتى مەن شىعارماشىلىعى، ادىستەمەلىك وي-پىكىرلەرى قامتىلعان تەست تاپسىرمالارىن ورىنداۋعا ارنالدى. ءۇشىنشى كەزەڭدە ۇمىتكەرلەر عالىمنىڭ شىعارماشىلىعى، ءتىل ۇيرەتۋ تاسىلدەرى، ادىستەمەلىك ماقالالارى، سونداي-اق ءتىل ۇيرەتۋ ساباقتارى بارىسىنداعى ءتۇرلى پەداگوگيكالىق-پسيحولوگيالىق جاعداياتقا بايلانىستى بەينەسۇراقتارعا جاۋاپ بەردى. بايقاۋدىڭ سوڭعى كەزەڭى قاتىسۋشىلاردىڭ وقۋ-ادىستەمەلىك قۇرالدارى، عىلىمي- ادىستەمەلىك ماقالالارى جانە شىعارماشىلىق جەتىستىكتەرىمەن تانىستىرۋعا ارنالدى.

ەلىمىزگە تانىمال عالىم، پەداگوگ، ادىسكەرلەردەن قۇرالعان قازىلار القاسى ءتىل ۇيرەتۋشى مامانداردىڭ مەملەكەتتىك ءتىلدىڭ قولدانىلۋ اياسىن كەڭەيتۋ جانە ونى ساپالى وقىتۋ ماقساتىندا الاش ارىسى يدەيالارىن جۇيەلى جالعاستىرا ءبىلۋىن، ونىڭ ءتىل ۇيرەتۋدەگى ءادىس- تاسىلدەرىن ءوز جۇمىسىندا ۇيلەسىمدى قولدانۋىن باعالادى.

ولاردىڭ پىكىرىنشە، بايقاۋعا قاتىسۋشىلار وقىتۋدىڭ قىر-سىرىن جاقسى مەڭگەرىپ، جاڭاشىل تاسىلدەردى ءتيىمدى پايدالانادى. شارا بارىسىندا وڭىرلەردە مەملەكەتتىك ءتىلدى وقىتۋمەن اينالىسىپ جۇرگەن ادىسكەر ماماندار، وقىتۋشىلار ءوزارا تاجىريبە الماسىپ، ادىستەمەلىك بىلىكتىلىكتەرىن شىڭدادى، وزىق تاجىريبەلەرمەن ءبولىستى. ەلىمىزدىڭ 11 وڭىرىندەگى تىلدەردى وقىتۋ ورتالىقتارىنىڭ قاتىسۋشىلارى تومەندەگىدەي ناتيجەگە قول جەتكىزدى.

قاراعاندىلىق حاسەنوۆا جانسايا قارسىلاستارىنان وق بويى وزىق شىعىپ، باس جۇلدەگەر اتاندى.

شىمكەنت قالالىق تىلدەردى وقىتۋ-ادىستەمەلىك ورتالىعىنىڭ وقىتۋشىسى بولات ءمولدىر وزگەلەردەن قارا ءۇزىپ شىعىپ، ەكىنشى ورىنعا يە بولدى.

قىزىلوردا وبلىسى مەن سولتۇستىك قازاقستان وبلىسى تىلدەردى وقىتۋ ورتالىقتارىنىڭ وقىتۋشىلارى ايدانا ماحامبەتوۆا مەن الينا سەيتىم بايگەنىڭ ءۇشىنشى ورنىن ءبولىستى. جەڭىمپازداردىڭ بارىنە دە ارنايى ديپلومدار مەن العىسحاتتار تاپسىرىلدى. قالعان قاتىسۋشىلار ىنتالاندىرۋ سىيلىقتارىمەن ماراپاتتالدى.


:ءبولىسۋ
پئكئر قالدئرؤ
+7
جئبةرؤ
ونلاين قىزمەتكەرلەر
رەداكتور
باقىتجول كاكەش
باقىتجول كاكەش
954-049
رەداكتور
بەيسەن سۇلتان
بەيسەن سۇلتان
954-049
رەداكتور
كۇنسۇلتان وتارباي
كۇنسۇلتان وتارباي
954-049

مۇراعات