قازاقستاندا تۇيە شارۋاشىلىعىن دامىتۋ جانە فەرمەرلەردى سۋبسيديالاۋ ماسەلەلەرى تالقىلاندى

تۇركىستان. قازاقپارات - «اۋىل» حالىقتىق- دەموكراتيالىق پاتريوتتىق پارتياسىنىڭ تۇركىستان وبلىسى بويىنشا فيليالى ەلىمىزدە تۇيە شارۋاشىلىعىن دامىتۋ ماسەلەلەرى بويىنشا كوشپەلى سەمينار- كەڭەس وتكىزدى.

پارتيا بەلسەندىلەرى تۇيە شارۋاشىلىعىن دامىتۋ مەن كاسىپپەن اينالىساتىن فەرمەرلەرگە سۋبسيديالار بەرۋ ماسەلەلەرى تالقىلاندى، دەپ حابارلايدى قازاقپارات ءتىلشىسى.

وتىرار اۋدانىنا قاراستى قاراقوڭىر اۋىلىندا وتكەن باسقوسۋدا «اۋىل» حالىقتىق- دەموكراتيالىق پاتريوتتىق پارتياسىنىڭ وكىلدەرى تۇيە وسىرەتىن شارۋالارعا بەرىلەتىن سۋبسيديا كولەمىن ارتتىرۋ مەن ولاردىڭ شىعىندارىن ەسكەرۋ كەرەكتىگىن ءسوز ەتتى. مامانداردىڭ ايتۋىنشا، تۇيە سۇتىنە سۇرانىس ارتقانىمەن وزىندىك قۇنىن اقتاماۋدا. ال، سۋبسيديا تەك وڭدەلگەن سۇتىنە عانا بەرىلەدى. كوپتەگەن قىمىران وندىرۋشىلەر ارنايى سەحتاردىڭ بولماۋىنان سۋبسيدياعا قول جەتكىزە الماۋدا. تۇيە تۇقىمىنان نەگىزى ءسۇت، ەت پەن ءجۇن وندىرىلەتىنى بەلگىلى. ال، شارۋانى قىنجىلتاتىنى وندىرىلگەن ونىمدەردى قايتا وڭدەۋ تەحنولوگياسىنىڭ كەنجەلەپ تۇرعانى.

وسى رەتتە ماماندار تۇيە ەتىن اس مازىرىنە ەنگىزۋدى ۇسىنادى. ءاربىر اسىل تۇقىمدى تۇيە مەن تاۋارلى انالىق باسقا بيۋدجەتتەن ارنايى قاراجات قاراستىرىلسا دەپ وتىر. سونداي- اق، تۇيەگە بولىنەتىن سۋبسيدياعا كوبىرەك كوڭىل بولىنگەن دۇرىس دەپ سانايدى. بۇدان وزگە تۇيە مالىن بانكتەر كەپىلدىككە الماعاندىقتان، كەپىلدىككە قويۋ ماسەلەلەرىن قاراستىرۋ قاجەت ەكەنىن العا تارتادى.