ەلوردالىق ايەل تۋىسىنىڭ ءۇيىن توناپ كەتتى

نۇر- سۇلتان. قازاقپارات - ەلوردادا ەر ادام بولىپ كيىنگەن ايەل تۋىسىنىڭ ۇيىنە كىرىپ، التىندارىن جىمقىرىپ كەتكەن، دەپ حابارلايدى قازاقپارات قالالىق پوليتسيا دەپارتامەنتىنىڭ باسپا ءسوز قىزمەتىنە سىلتەمە جاساپ.

وتباسى مۇشەلەرىنىڭ ءبارى قوناققا كەتىپ، پاتەردىڭ قاراۋسىز قالاتىنىن الدىن الا بىلگەن ايەل كىرەبەرىس ەسىك كىلتىن جاساتىپ العان. پاتەرگە قالاي كىرۋدىڭ جولدارىن ويلاستىرا وتىرىپ، ول ءۇيدىڭ جانىنداعى قاۋىپسىزدىك كامەرالارىنا ءتۇسىپ قالماۋعا تىرىسىپتى. ول ءۇشىن ايەل ەرلەردىڭ كيىمىن كيىپ، ءجۇرىسىن وزگەرتكەن.

«تۋىستارى قوناققا كەتىپ قالعان كۇنى ەرلەردىڭ كۇرتەسى مەن باس كيىمىن كيىپ العان ايەل ۇرلىق جاساعان. ەر ادامنىڭ ءجۇرىسىن سالا وتىرىپ، ول ۇيگە جاقىنداپ، پاتەرگە ەركىن كىرىپ، قۇنى 1 ميلليون تەڭگەلىك التىن بۇيىمداردى الىپ شىققان. وسىدان سوڭ كۇدىكتى كوشەدە ءوز كيىمىن اۋىستىرىپ، ەرلەر كۇرتەسىن لاقتىرىپ جىبەرگەن. ول ۇرلانعان زەرگەرلىك بۇيىمداردى 370 مىڭ تەڭگەگە لومباردقا تاپسىرعان. التىن بۇيىمداردى پوليتسيا لومباردتان تاركىلەدى»، - دەپ حابارلايدى دەپارتامەنتتىڭ باسپا ءسوز قىزمەتىنەن.

ۇيىنە ورالعان تۋىستارى پوليتسياعا جۇگىنىپتى. جەدەل ىزدەستىرۋ شارالارى بارىسىندا ايەل ۇستالىپ، كىناسىن مويىنداعان. قازىر وسى ىسكە قاتىستى تەرگەۋ امالدارى جۇرگىزىلىپ جاتىر.