USD 429.57 EUR 447.35
RUB 6.94 CNY 63.23
جاڭالىقتار

دەپۋتات جاپپاي ەرەۋىلگە قاتىسقانداردى ۇستاۋ جايلى: اسىرا سىلتەۋ بولىپ جاتقان ءتارىزدى

22 قاڭتار 13:13
:ءبولىسۋ
دەپۋتات جاپپاي ەرەۋىلگە قاتىسقانداردى ۇستاۋ جايلى: اسىرا سىلتەۋ بولىپ جاتقان ءتارىزدى

نۇر- سۇلتان. قازاقپارات - ق ر پارلامەنتى ءماجىلىسىنىڭ دەپۋتاتى ەرلان سايروۆ جاپپاي ەرەۋىلگە قاتىسىپ، قاماۋعا الىنعان ازاماتتاردىڭ ومىرىنە الاڭداتۋشىلىق تانىتتى، دەپ حابارلايدى قازاقپارات ءتىلشىسى.

«جان- جاقتان ازاماتتار قاڭتار وقيعالارىنان كەيىن تۇزەتۋ مەكەمەلەرىنە تۇسكەن كىسىلەرگە قيناۋ، ازاپتاۋ ادىستەرىنىڭ قولدانىپ جاتقانىن جەتكىزىپ جاتىر. ارينە، بىزگە شىندىققا جەتۋ كەرەك. مەملەكەتتىك تۇتاستىعىمىزدى ساقتاۋدىڭ تەتىكتەرىن جاساۋ وتە ماڭىزدى. زاڭ مەن ءتارتىپ سول تۇتقانىڭ بىرەگەيى. ءبىراق، شىندىققا جاپپاي ۇرىپ- سوعۋمەن، قيناۋمەن جەتۋ مۇمكىن ەمەس. اسىرا سىلتەۋ بولىپ جاتقان ءتارىزدى»، - دەپ جازدى ەرلان سايروۆ Facebook پاراقشاسىندا.

حالىق قالاۋلىسىنىڭ پىكىرىنشە، قۇقىق قورعاۋ ورىندارى كۇش كورسەتۋ ءادىسىن قولدانباۋى كەرەك. «وندا وتىرعان كىسىلەر ءبىزدىڭ ازاماتتار، قازاق ەكەندىگىن، «بىرەۋگە باۋىر، بىرەۋگە اعا» بولاتىندىعىن، سىرتقى، ىشكى كۇشتەردىڭ ايداعىنا ىلەسىپ كەتۋى مۇمكىن ەكەندىگىن ەسكەرۋىمىز قاجەت.

«اداسقان جاندارعا» مەملەكەت ءوزىنىڭ گۋمانيزمىن كورسەتۋى ابزال. ارينە، قولىنا قارۋ الىپ مەملەكەتتىك مەكەمەلەرگە وق اتقان، دۇكەن توناعاندار زاڭ جۇزىندە قاتاڭ جازاسىن الۋى كەرەك. زاڭ قاتال، ءبىراق ول زاڭ. زاڭ مەن ءتارتىپ - مەملەكەتتىڭ باستى فۋندامەنتى. ءبىراق، ۇرىپ- سوعۋ، قيناۋ، ازاماتتىق قۇقىقتى تاپتاۋعا جول بەرۋگە بولمايدى. بىزگە قازىر كەشىرىم، مەيىرىم، باۋىرلاستىق سەزىمىن كۇشەيتەتىن قادامدار وتە قاجەت»، - دەيدى ول.

سونداي- اق، ءماجىلىس دەپۋتاتى اتالعان ماسەلە بويىنشا قۇزىرلى ورگاندارعا ساۋال جولدايتىنىن ايتتى. ەسكە سالا كەتسەك، مەملەكەت باسشىسى قاسىم- جومارت توقايەۆ ميتينگتە ۇستالعاندار جايلى: جاۋاپكەرشىلىكتى اۋىرلاتاتىن ءمان- جاي بولماسا جازانى جەڭىلدەتكەن ءجون دەگەن ەدى. ودان بولەك، پرەزيدەنتتىڭ باسپا ءسوز حاتشىسى بەرىك ءۋالي بەيبىت دەمونستراتسياعا قاتىسۋشىلار قىلمىستىق جاۋاپكەرشىلىككە تارتىلماۋى كەرەكتىگىن ايتتى.

اۆتور: ءالي يبرايەۆ


:ءبولىسۋ
سونداي-اق... وقىڭىز
پئكئر قالدئرؤ
+7
جئبةرؤ

مۇراعات