USD 431.41 EUR 452.94
RUB 6.92 CNY 63.83
جاڭالىقتار

قىسقى وليمپيادادا قازاقستان تۋىن ۇستاپ شىققان سپورتشىلار كىمدەر

26 قاڭتار 19:14
:ءبولىسۋ
قىسقى وليمپيادادا قازاقستان تۋىن ۇستاپ شىققان سپورتشىلار كىمدەر

نۇر-سۇلتان. قازاقپارات - وليمپيادا ويىندارىندا تۋ ۇستاپ شىعۋ ۇلكەن ابىروي جانە ول سپورتشىعا اۋىر مىندەت. سەبەبى ول سپورتشى ونى جاي كوتەرىپ قانا قويماي، جەڭىسىمەن قايتا جەلبىرەتىپ قايتۋعا بارىنشا كۇش-جىگەرىن سالۋعا تىرىسادى.

ەندى ساناۋلى كۇندەردەن كەيىن بەيجىڭدە اق وليمپيادانىڭ الاۋى تۇتانادى. وندا ەلىمىزدىڭ بايراعىن بيىل العاش رەت ءبىر ەمەس، ەكى سپورتشى الىپ شىعادى. ونىڭ ءبىرى - شورت-ترەكتەن قازاقستان قۇراماسىنىڭ كوشباسشىسى ابزال اجىعاليەۆ بولسا، ەكىنشىسى - كونكيشى ەكاتەرينا ايدوۆا.

ەكى سپورتشىمىز دا قۇراماداعى تاجىريبەلى، جۇلدەگە تالاسۋعا مۇمكىندىگى جوعارى سپورتشىلار.

ابزال اجىعاليەۆتىڭ ەنشىسىندە شورت-ترەكتەن الەم كۋبوگى كەزەڭدەرىنىڭ بارلىق جۇلدەسى بار. 2017-جىلعى ۋنيۆەرسيادا، 2011-جىلعى ازيا ويىندارىنىڭ جۇلدەگەرى. ابزال 2014 - جانە 2018-جىلدارداعى وليمپياداعا قاتىسىپ، پحەنچحاندا قازاقستاننىڭ تۋىن كوتەرىپ شىققان بولاتىن. ول مۇنداي قۇرمەتكە ەكىنشى رەت يە بولىپ وتىر.

ال ەكاتەرينا ايدوۆا العاش رەت 2010-جىلى ۆانكۋۆەر وليمپياداسىنا قاتىسقان. كەيىن سوچي-2014 جانە پحەنچحان-2018 ويىندارىندا ەل نامىسىن قورعادى. 30 جاستاعى ايدوۆا ءۇشىن بەيجىڭ ويىندارى ءوز مانسابىنداعى ءتورتىنشى وليمپيادا بولماق.

تاجىريبەلى سپورتشى كونكيمەن جۇگىرۋدەن الەم كۋبوگى كەزەڭىنىڭ، 2017-جىلعى ۋنيۆەرسيادا ويىندارىنىڭ جۇلدەگەرى، 2021-جىلعى ءتورت قۇرلىق چەمپيوناتىنىڭ جەڭىمپازى.

دەمەك، ەكى سپورتشىمىز دا مەملەكەت باسشىسى قاسىم-جومارت توقايەۆ سەنىپ تاپسىرعان تۋىمىزدى جەڭىس تۇعىرىندا جەلبىرەتۋگە مۇمكىندىكتەرى بار.

تاريح بەتتەرىنە كوز جۇگىرتسەك، 1998-جىلعى جاپونيانىڭ ناگانو قالاسىندا وتكەن X Ⅷ قىسقى وليمپيادا ويىندارىندا قازاقستان تۋىن كوتەرىپ شىققان شاڭعىشى ۆلاديمير سميرنوۆ قولا مەدالمەن ورالدى. ول 1994-جىلى نورۆەگيانىڭ ليللەحامەر قالاسىندا وتكەن قىسقى وليمپيادادا 1 التىن، 2 كۇمىس جۇلدە جەڭىپ العان بولاتىن.

مىنە، سودان كەيىن، ءالى ەشبىر سپورتشىمىز تۋدى كوتەرىپ بارىپ، جەڭىسپەن ورالىپ كورگەن ەمەس.

ەندەشە، اجىعاليەۆ پەن ايدوۆاعا ارتىلاتىن مىندەت اۋىر ەكەنى انىق...

ەندى وتكەن اق وليمپيادا ويىندارىندا قازاقستان بايراعىن كىمدەر الىپ شىققانىن قايتا ءبىر وي ەلەگىنەن وتكىزىپ كورەيىك.

ليللەحاممەر - 1994-جىلعى قىسقى وليمپيادا ويىندارى - قايرات بيەكەنوۆ (ترامپليننەن سەكىرۋ)

ناگانو - 1998-جىلعى قىسقى وليمپيادا ويىندارى - ۆلاديمير سميرنوۆ (شاڭعى جارىسى)

سولت-لەيك-سيتي - 2002-جىلعى قىسقى وليمپيادا ويىندارى - راديك بيكچەنتايەۆ (كونكيمەن جۇگىرۋ)

تۋرين - 2006-جىلعى قىسقى وليمپيادا ويىندارى - الەكساندر كورەشكوۆ (حوككەي)

ۆانكۋۆەر - 2010-جىلعى قىسقى وليمپيادا ويىندارى - دياس كەڭەشيەۆ (بياتلونشى)

سوچي - 2014-جىلعى قىسقى وليمپيادا ويىندارى - ەردوس احماديەۆ، (شاڭعى جارىسى)

پحەنچحان -2018-جىلعى قىسقى وليمپيادا ويىندارى - ابزال اجىعاليەۆ (شورت-ترەك).

ايتا كەتەيىك، وليمپيادا ويىندارى 4- اقپان كۇنى باستالىپ، 16- اقپاندا مارەسىنە جەتەدى. الدىن الا مالىمەتتەر بويىنشا، بۇل ويىندارعا الەمنىڭ 95 ەلىنەن 4 مىڭنان استام سپورتشى قاتىسادى. وندا 109 مەدال جيىنتىعى ساراپقا سالىنادى.

اۆتور: كۇنسۇلتان وتارباي


:ءبولىسۋ
سونداي-اق... وقىڭىز
پئكئر قالدئرؤ
+7
جئبةرؤ

مۇراعات