«ءسۇيىنشى اكە!» دەگەن ءبىر اۋىز حابارىن ەستىگىمىز كەلەدى - فريستايلشى اقمارجان قالمىرزايەۆانىڭ اكەسى
10 اقپان 09:33

«ءسۇيىنشى اكە!» دەگەن ءبىر اۋىز حابارىن ەستىگىمىز كەلەدى - فريستايلشى اقمارجان قالمىرزايەۆانىڭ اكەسى

نۇر- سۇلتان. قازاقپارات - بۇگىن بەيجىڭ وليمپياداسىندا فريستايلدان ەل نامىسىن قورعايتىن سپورتشىلارىمىز جارىس الاڭىنا شىعادى.

ولاردىڭ اراسىندا جاس سپورتشىمىز اقمارجان قالمىرزايەۆا دا بار.

وسىعان وراي اقمارجاننىڭ اكەسى قايرات ساتبەك ۇلىمەن تەلەفون ارقىلى تىلدەسىپ، از- كەم اڭگىمەگە تارتقان ەدىك.

- قايرات ساتبەك ۇلى، ءوزىڭىزدى قازاقپارات وقىرماندارىنا تانىستىرىپ وتسەڭىز.. .

- مەن قايرات ساتبەك ۇلى قالمىرزايەۆپىن، شىمكەنت قالاسىنىڭ تۇرعىنىمىن.

- قايدا، كىم بولىپ قىزمەت ەتەسىز؟

- ورتالىق ازيا يننوۆاتسيالىق ۋنيۆەرسيتەتىندە «سپورت» كافەدراسىن باسقارامىن.

- قىزىڭىز اقمارجان اق وليمپيادادا ەل نامىسىن قورعاۋعا بەيجىڭگە اتتانىپ كەتكەنىنە اپتادان استام ۋاقىت بولدى. بالاڭىزدان قانداي ءۇمىت كۇتىپ وتىرسىز؟

- قاي اتا- انا ءوزىنىڭ بالاسىن بيىكتەردەن كورگىسى كەلمەيدى دەيسىز. ءبىز دە سول قىزىمىز اقمارجان ەلىنىڭ بايراعىن جەلبىرەتىپ، ابىرويمەن ورالسا ەكەن دەپ وتىرمىز. «ءسۇيىنشى اكە!» دەگەن ءبىر اۋىز حابارىن ەستىگىمىز كەلەدى. كۇندە تۋىس- تۋعان، دوس جاراندارىمىز دا اقمارجان جارىسقا قاشان شىعادى دەپ قوڭىراۋ شالىپ، سۇراپ جاتىر. بۇگىن وليمپيادا ويىندارىنداعى العاشقى جارىسىنا شىعادى. ب ءارىمىز ت ەك ساتتىلىك سەرىك بولسا ەكەن دەپ تىلەيىك.

- اقمارجانمەن بەيجىڭ وليمپياداسىنا كەتكەلى بەرى سوڭعى رەت قاشان سويلەستىڭىز؟ كوڭىل- كۇيى قالاي سياقتى؟

- قىزىمىزدىڭ ۇيدە بولعانىنان تۇزدە جۇرگەنى كوپ. بىردە ەل ىشىندە جاتتىعۋدا جۇرسە، بىردە شەتەلدە جارىستا جۇرەدى. ءبىر كەتكەندە ايلاپ كەتەدى. ءبىز تەك، تەلەفوندا، الەۋمەتتىك جەلىلەردە عانا تىلدەسىپ، اماندىعىن ءبىلىپ تۇرامىز. بەيجىڭگە امان- ەسەن جەتىپ الدى. جاقىندا عانا سويلەستىك. كوڭىل كۇيى ءبارى جاقسى. ەندى سول ەل ءۇمىتىن اقتاپ ءبىر مەدال السا دەپ وتىرمىز.

- قىزىڭىز بۇل سپورتقا قاشان، قالاي كەلدى؟

- 11 جاسىندا كەلدى. بۇل سپورتتى ءوزى تاڭدادى. نەگىزى العاش رەت كوركەم گيمناستيكامەن اينالىسقان بولاتىن. ول سپورت تۇرىنەن دە جاقسى كورسەتكىشتەرگە قول جەتكىزدى. ءبىراق كەيىن، وسى فريستايلعا اۋىسىپ كەتتى. قازىرگى تاڭداعان سپورتىنان دا جامان بولعان جوق. كوپتەگەن الەمدىك جارىستارعا قاتىسىپ جۇلدەگەرلەر قاتارىنان كورىنىپ ءجۇر. ەندى وسى وليمپيادانىڭ ءبىر مەدالىن السا دەپ ارماندايمىز.

- اقمارجاننىڭ قانداي جەتىستىگى ەسىڭىزدەن كەتپەيدى؟

- العاش گيمناستيكامەن اينالىسىپ جۇرگەن كەزدەگى جەڭىستەرى ەسىمنەن كەتپەيدى. ول كەزدە كىشكەنتاي- تۇعىن. بارعان جارىستارىنىڭ بارلىعىنان جۇلدەسىز قايتپايتىن. ءبىر كۇنى «اكە كەلىپ سىيلىعىمدى الىپ كەتىڭىزشى» دەيدى. «ول نە سىيلىق كوتەرە المايتىن» دەسەم، «ۇلكەن قوراپتا، كەلىڭىز» دەپ قويمايدى. بارسام شىنىمەن ۇلكەن قوراپ ەكەن. ىشىندەگى سىيلىق كادىمگى تەليەۆيزور. ول كەزدەگى تەليەۆيزور شىنىمەن ۇلكەن ەدى عوي. كەيىن، اقمارجان ۇلكەيدى، ەسەيدى، ەسىن جينادى. بالا كەزىندە وبلىستارعا شىعارىپ سالىپ، ساعىنىپ كۇتىپ الاتىنبىز. قازىر جىلىنا ءبىر- ەكى رەت كەلەدى. كەتتىم دەپ كەتىپ جاتادى. ءبىز تەك سىرتتاي اماندىعىن تىلەپ، ءوزى سۇيگەن كاسىبىنە كەدەرگى كەلتىرمەيمىز.

- اقمارجان سپورتتان بولەك تاعى قانداي ىستەرمەن اينالىسقاندى ۇناتادى؟ بوس ۋاقىتىن ۇيدە قالاي وتكىزەدى؟

- ۇيدە بولعاندا اناسىنا كومەكتەسەدى. اناسى قالاداعى مەكتەپتەردىڭ بىرىندە سۋرەت سالۋ ءمۇعالىمى. اناسىمەن بىرگە سۋرەت سالعاندى ۇناتادى. تاماقتى ءوزى پىسىرگەندى جاقسى كورەدى.

- جالپى، قىزىڭىزدىڭ سپورتپەن اينالىسقانىنا قۋاناسىز با، الدە قارسى بولعان كەزدەرىڭىز بولدى ما؟

- جاستىق شاعىندا ارينە سپورتپەن اينالىسقانى جاقسى. ءبىراق، قىز بالاعا سپورت ماڭگىلىك جولداس بولا بەرمەيدى. مەن اقمارجانعا 20 جاسقا تولعان كەزىندە «قىزىم، ەندى سپورتتى قويساڭ قايتەدى» دەپ ايتتىم. سول كەزدە قىزىم ماعان «اكە ارعى ويىڭىزدى ءتۇسىنىپ تۇرمىن. ءار نارسەنىڭ ەرتەمە، كەشپە ءوز ۋاقىتى بولادى. مەن دە سول ءوزىم جوسپارىم بويىنشا ۋاقىتى بولعاندا قويا قويامىن» دەدى. سودان قايتىپ ەشتەڭە ايتقان ەمەسپىن. جالپى، قازىرگى سپورتى ەكىنىڭ ءبىرى جالىنان ۇستاي بەرمەيتىن اساۋ سپورتتىڭ ءبىرى.

اكەسى بولعان سوڭ دەنساۋلىعىن ويلاپ، ۋايىمدايتىن كەزىمىز بولادى. مىنە، بيىل جيىرما التى جاسقا تولىپ وتىر. اقىل توقتاتىپ، تولىسقان كەزدەرى عوي. ارى قاراي قىزىم قانداي جولمەن جۇرەدى، ءوزى شەشەدى.

- اڭگىمەڭىزگە راحمەت! اقمارجانعا ساتتىلىك تىلەيمىز.

اۆتور: كۇنسۇلتان وتارباي

جاڭالىقتار