باقىت سۇلتانوۆ جۇمىس ساپارىمەن الماتى وبلىسىنا باردى
18 اقپان 22:11

باقىت سۇلتانوۆ جۇمىس ساپارىمەن الماتى وبلىسىنا باردى

نۇر-سۇلتان. قازاقپارات - الماتى وبلىسىنا جۇمىس ساپارى بارىسىندا ق ر پرەمەر-ءمينيسترىنىڭ ورىنباسارى - ساۋدا جانە ينتەگراتسيا ءمينيسترى باقىت سۇلتانوۆ ءوڭىردىڭ الەۋمەتتىك-ەكونوميكالىق دامۋ ماسەلەلەرى بويىنشا جۇمىس كەڭەسىن وتكىزدى، دەپ حابارلايدى primeminister.kz.

وبلىس اكىمى قانات بوزىمبايەۆ ءبىرقاتار پروبلەمالىق ماسەلەلەردى جانە ولاردى شەشۋدىڭ ىقتيمال جولدارىن اتاپ ءوتتى.

اتاپ ايتقاندا، ول ىستەن شىعىپ قالعان سۋارمالى جەرلەردى اينالىمعا تارتۋ جانە وسى ساناتتاعى جەرلەردەن اۋىل شارۋاشىلىعى ونىمدەرىنىڭ سالىق جيناۋىن %35 عا ارتتىرۋ جونىندەگى شارالار تۋرالى حابارلادى.

سونىمەن بىرگە، وبلىس اكىمى ب. سۇلتانوۆقا توزعان سۋ قۇبىرى جەلىلەرىن رەكونسترۋكتسيالاۋ، وبلىستىڭ ەلدى مەكەندەرىن گازداندىرۋدى جالعاستىرۋ، تاۋ-كەن ءوندىرۋ ونەركاسىبىن، تالدىقورعان قالاسىنىڭ ينجەنەرلىك-كولىك ينفراقۇرىلىمىن دامىتۋ، كەزەكتە تۇرعانداردى قولجەتىمدى جانە ساپالى تۇرعىن ۇيمەن قامتاماسىز ەتۋ، ءۇش اۋىسىمدى وقىتۋدى جويۋ، كوممۋنالدىق مەنشىكتى باسقارۋدىڭ كەيبىر ماسەلەلەرى، قوعامدىق جۇمىستار مەن مۇعالىمدەردىڭ جالاقىسىن ۇيىمداستىرۋ، سونداي-اق ساياجاي الاپتارىنىڭ پروبلەمالارىن شەشۋ بارىسى تۋرالى باياندادى.

قانات بوزىمبايەۆتىڭ ايتۋىنشا، جوعارىدا اتالعان ءبىرقاتار پروبلەمالاردى شەشۋ ءۇشىن قوسىمشا بيۋدجەتتىك قارجىلاندىرۋ قاجەت. اكىم پرەمەر-ءمينيستردىڭ ورىنباسارىنان ءوڭىردىڭ وتىنىمدەرىن قولداۋدى سۇرادى.

پرەمەر-ءمينيستردىڭ ورىنباسارى - ساۋدا جانە ينتەگراتسيا ءمينيسترى باقىت سۇلتانوۆ قازىرگى ۋاقىتتا ۇكىمەتتىڭ كەڭەيتىلگەن وتىرىسىندا ايتىلعان ەل پرەزيدەنتىنىڭ تاپسىرمالارىن ءتيىمدى ورىنداۋ ماقساتىندا بيۋدجەتتى ناقتىلاۋ جوباسىن دايىنداۋ جۇمىستارى جۇرگىزىلىپ جاتقانىن اتاپ ءوتتى.

«بارلىق ماسەلەلەردى قارجى جانە ۇلتتىق ەكونوميكا مينيسترلىكتەرى تالدايتىن بولادى. كەڭەستە ايتىلعان بىردە-ءبىر ماسەلە نازاردان تىس قالمايدى»، - دەدى ب. سۇلتانوۆ.

ول سونداي-اق اكىمدىكتىڭ ازىق-تۇلىك قاۋىپسىزدىگىن قامتاماسىز ەتۋ، الەۋمەتتىك ماڭىزى بار تاۋارلاردىڭ باعاسىن باقىلاۋ جانە جالپى ساۋدا سالاسىن دامىتۋ ماقساتىندا نارىقتار مەن بازارلاردى جاڭعىرتۋ جونىندەگى جۇمىسىنىڭ باسىمدىعىنا نازار اۋداردى. ق ر پرەمەر-ءمينيسترىنىڭ ورىنباسارى - ساۋدا جانە ينتەگراتسيا ءمينيسترى باقىت سۇلتانوۆتىڭ الماتى وبلىسىنا جۇمىس ساپارى قازاقستان-قىتاي شەكاراسىنداعى «نۇر جولى» وتكىزۋ پۋنكتىنە، «قورعاس - شىعىس قاقپاسى» ەركىن ەكونوميكالىق ايماعىنا، «قورعاس» ح ش ى و- عا بارۋىمەن جالعاستى.

«نۇر جولى» وتكىزۋ پۋنكتىندە ب. سۇلتانوۆ جاۋاپتى ماماندارمەن، سونداي-اق جۇك تاسىمالداۋ پروتسەسىنە قاتىسۋشىلارمەن تاۋارلاردى تاسىمالداۋدىڭ قولدانىستاعى ءتارتىبىنىڭ تەتىكتەرىن جانە جۇكتەردى تاسىمالداۋ پروتسەسىن جەتىلدىرۋ جۇيەسىن تالقىلادى.

بۇل رەتتە، باستى نازار جۇك تاسىمالداۋدىڭ ءبىرىڭعاي ەلەكتروندىق كەزەگىن ۇيىمداستىرۋ ادىستەرىن تالقىلاۋعا جانە جۇك تاسىمالداۋدىڭ جەكە وپەراتورلارىن (قازىرگى ۋاقىتتا ولاردىڭ ەكەۋى) الىپ تاستاۋ ەسەبىنەن تاسىمالداۋ قۇنىن ەداۋىر قىسقارتۋعا اۋدارىلدى.

جۇك تاسىمالداۋشىلارعا قول جەتكىزۋ ءتاسىلىن وزگەرتۋ مىندەتى قويىلدى. جەرگىلىكتى تاسىمالداۋشىلاردىڭ الەۋمەتتىك ماسەلەلەرىن شەشۋ جانە جۇمىسپەن قامتۋدى قامتاماسىز ەتۋ ءۇشىن ون كۇن ىشىندە باستاماشىل توبىمەن بىرگە جۇكسىز كولىكتەردى الىپ تاستاي وتىرىپ كەزەكتى «تازالاۋ» تاپسىرىلدى.

سونىمەن بىرگە ءارتۇرلى جۇك تۇرلەرىن تاسىمالداۋشىلاردىڭ وڭتايلى مودەلىن ازىرلەۋ تاپسىرىلدى.

«قورعاس - شىعىس قاقپاسى» ا ە ا كەڭسەسىندە وتكەن كەڭەستە ورتالىق مەملەكەتتىك ورگاندار مەن ءوڭىر اكىمدىگىنىڭ وكىلدەرىمەن قورعاس تورابىن - «قورعاس» حالىقارالىق شەكارا ماڭى ىنتىماقتاستىعى ورتالىعىن جاڭعىرتۋدى قوسا العاندا، ترانسشەكارالىق حابتاردى دامىتۋ تۇجىرىمداماسىن تالقىلادى. قازىرگى ۋاقىتتا «قورعاس» ح ش ى و اۋماعىندا قازاقستاندىق جانە شەتەلدىك كاپيتالدىڭ قاتىسۋىمەن ءبىرقاتار ينۆەستيتسيالىق جوبالاردى ىسكە اسىرۋ پىسىقتالۋدا: ءسۇت، شۇلىق-ۇيىق ونىمدەردىڭ، بولمەارالىق ەسىكتەردىڭ ءوندىرىسىن اشۋ، جۇمساق جانە كورپۋستىق جيھازداردى قۇراستىرۋ جانە باسقالارى.

باقىت سۇلتانوۆ ترانسشەكارالىق ونەركاسىپتىك كووپەراتسيا ورنى رەتىندە حابتاردى قالىپتاستىرۋ مەن دامىتۋدىڭ ءبىرىڭعاي جۇيەسىن ازىرلەۋ قاجەتتىگىنە باسا نازار اۋداردى. «بىزگە تەك ديۋتي-فري قاجەت ەمەس. وندىرىستەردى، سونىڭ ىشىندە ەكسپورتقا باعدارلانعان وندىرىستەردى قۇرۋ جونىندە جۇمىس ىستەۋ قاجەت. سوندىقتان حابتاردىڭ نەگىزگى اۋماقتارى يندۋستريالىق-لوگيستيكالىق ايماققا اينالۋى ءتيىس. ارينە، ساۋدا جانە تۋريستىك ايماقتاردى تولىعىمەن جوققا شىعارۋعا بولمايدى. ءبىراق ولار وندىرىستەن باسىم بولماۋى كەرەك»، - دەدى ب. سۇلتانوۆ.

جاڭالىقتار