الماتى وبلىسىندا بالۋان جىگىتتەر نار كوتەرۋدەن سىنعا ءتۇستى
22 ناۋرىز 10:57

الماتى وبلىسىندا بالۋان جىگىتتەر نار كوتەرۋدەن سىنعا ءتۇستى

تالدىقورعان. قازاقپارات - ءاپپاق قارداي كيىز ۇيلەر، حالىق بيلەرى، ءان شاشۋ، ءدامدى تاعامدار: ىستىق باۋىرساق پەن ناۋرىز كوجە.

الماتى وبلىسىنىڭ تۇرعىندارى پاندەميادان كەيىن اراعا ەكى جىل سالىپ ءاز ناۋرىزدى ءدال وسىلاي اتاپ ءوتتى، دەپ حابارلايدى قازاقپارات.

بۇل كۇنى وبلىس اكىمى قانات بوزىمبايەۆ كوپتىڭ قۋانىشىن ءبولىستى. قالىپتاسقان ءداستۇر بويىنشا بارلىق نەگىزگى مەرەكەلىك ءىس-شارالار «جاستار» مادەنيەت جانە دەمالىس ساياباعىندا ءوتتى.

سونىمەن قاتار، ق ر مەملەكەتتىك تۋىنىڭ جانىنداعى الاڭدا قازاق حالقىنىڭ سالت-داستۇرلەرىمەن تانىسۋعا بولاتىن اقشاڭقان ۇيلەر تىگىلدى. سونداي-اق، جاستار ءبي، ۆوكالدىق كومپوزيتسيالاردى ورىنداۋدا ءوز تالانتتارىن كورسەتتى، ارنايى تاقىرىپقا سۋرەتتە سالدى.

سپورتتىق سايىستاردا وتكىزىلىپ مەرەكەنىڭ شىرايىن اشا ءتۇستى.

اسىرەسە، تۇيە كوتەرۋ سايىسى كەلگەن كوپتى تاڭ قالدىردى.

ەردىڭ بىلەكتىسى سىنعا تۇسكەن جارىستا يبراگيم بەرسانوۆ نار كوتەرۋدە جەڭىسكە جەتتى، بۇل وقيعا كورەرمەن تاڭدانىسىن تۋدىردى.

ال، «جاستار» ساياباعىنىڭ ورتالىق الاڭىندا مەرەكەگە ازىرلەگەن مادەني باعدارلاما شارىقتاۋ شەگىنە جەتتى.

ايتا كەتەيىك، بۇل كۇنى وبلىس ورتالىعىندا 2000 ليتر ناۋرىز كوجە تاراتىلدى. بۇدان باسقا، ءتۇرلى قايىرىمدىلىق اكسيالارى وتكىزىلدى.

مەرەكە كۇنى ەتنو-اۋىل سالتانات قۇردى. ۇلىستىڭ ۇلى كۇنىن تويلاۋعا كەلگەن حالىقتىڭ قاراسى قالىڭ بولدى.

اراعا ەكى جىل سالىپ، وتكىزىلگەن العاشقى دۋمان-تويدى تاماشالاۋعا كەلۋشىلەردىڭ قۋانىشىندا شەك جوق. سونىڭ ءبىرى - ءاليا كارىموۆا.

- ءبىز بۇل كۇندى ۇزاق كۇتتىك، بۇگىن نەمەرەلەرىممەن بىرگە الاڭعا شىعىپ، ناۋرىز كوجە ءىشىپ، قازاق داستۇرلەرىمەن تانىسىپ، جارىستارعا قاتىستىق، - دەدى ءاليا كارىموۆا.

ەل-جۇرت اسىعا كۇتكەن ءاز-ناۋرىز مەرەكەسى ءسان-سالتاناتىمەن الماتى وبلىسىندا اتالىپ ءوتتى.

وسىلايشا، ۇلىس وڭ، اق مول بولسىن دەگەن نيەتپەن كەلگەن كوپ تارقاستى.

جاڭالىقتار