التىنەمەلدە سىلەۋسىن كۇشىكتەرىمەن بىرگە كامەراعا ءتۇسىپ قالدى
31 ناۋرىز 16:08

التىنەمەلدە سىلەۋسىن كۇشىكتەرىمەن بىرگە كامەراعا ءتۇسىپ قالدى

الماتى. قازاقپارات - التىنەمەل ۇلتتىق پاركىندە «قىزىل كىتاپقا» ەنگەن تۇركىستان سىلەۋسىنى ۆيدەوعا ءتۇسىپ قالدى، دەپ حابارلايدى قازاقپارات ءتىلشىسى.

ونىڭ ۆيدەوسى پاركتىڭ الەۋمەتتىك پاراقشاسىندا جاريالاندى.

ۆيدەودا ەنەسىنىڭ ارتىنان شامامەن ءبىر جاستاعى 3 سىلەۋسىن كۇشىگىنىڭ ەرىپ جۇرگەنىن كورۋگە بولادى.

«بۇل سيرەك كەزدەسەتىن قۇبىلىس. ادەتتە سىلەۋسىن ەكىدەن ارتىق كۇشىكتەمەيدى. ال بۇل سىلەۋسىندە ۇشەۋ. مۇنداي وقيعا ۇلتتىق ساياباقتا سىلەۋسىن ءۇشىن قولايلى ءومىر ءسۇرۋ جاعدايى بار ەكەنىن كورسەتەدى. ولاردىڭ نەگىزگى ازىعى - ءسىبىر تاۋ ەشكىسىنىڭ لاعى مەن جابايى قاباننىڭ بالاسى جانە سيرەك كەزدەسەتىن كەكىلىكتەر»، - دەلىنگەن حابارلامادا.

«التىنەمەل» - الماتى وبلىسىنداعى ىلە وزەنىنىڭ القابىنداعى مەملەكەتتىك ۇلتتىق تابيعي پارك.


جاڭالىقتار