بالقاش كولىن دامىتۋدىڭ باس جوسپارى ازىرلەندى
21 ءساۋىر 20:29

بالقاش كولىن دامىتۋدىڭ باس جوسپارى ازىرلەندى

تالدىقورعان. قازاقپارات - بالقاش كولىن دامىتۋدىڭ باس جوسپارى ازىرلەندى، - دەپ حابارلايدى قازاقپارات.

سارقان اۋدانىنىڭ كوكونىس پەن الما وسىرۋدە، تاۋ تۋريزمى مەن بالقاش جاعالاۋىن دامىتۋدا، بالىق شارۋاشىلىعىن وركەندەتۋدە مۇمكىندىگى مول.

دەگەنمەن مۇندا شاعىن جانە ورتا بيزنەس ءالى دە كەڭ ءورىس الا الماي وتىر. ازىرگە اۋداننىڭ وبلىس كولەمىندە وسى سالاداعى ۇلەسى نەبارى %2,2.

بۇل تۋرالى بۇگىن سارقان اۋدانىنىڭ حالقىمەن كەزدەسۋ وتكىزگەن الماتى وبلىسىنىڭ اكىمى قانات بوزىمبايەۆ ايتتى.

«مۇندا تاۋ تۋريزمى مەن بالقاش كولىنىڭ جاعالاۋىن دامىتۋعا ەرەكشە ءمان بەرىلەدى. قازىر «بالقاش» تۋريستىك-رەكرەاتسيالىق ايماق» جوباسىنىڭ ەگجەي-تەگجەيلى جوسپارى دايىن. وسى ايماققا جۇرگىزىلەتىن ينجەنەرلىك كوممۋنيكاتسيا جۇيەلەرى قۇرىلىسىنىڭ دا جوبا-سمەتالىق قۇجاتتارى جاسالدى. بالقاشقا اپاراتىن جول جوندەلىپ جاتىر. وسى شارالاردىڭ بارلىعى مۇندا كەلەتىن تۋريستەر لەگىن 5 ەسەگە ارتتىرادى دەپ جوسپارلانعان. بالقاش جاعالاۋىندا زاماناۋي دەمالىس ايماعىن قۇرىپ، سەرۆيس ساپاسىن كوتەرۋ ءۇشىن ينۆەستورلار تارتۋدى جانداندىرۋ كەرەك. سارقاننىڭ بالىق شارۋاشىلىعىن دامىتاتىن الەۋەتى بار. ءبىراق بالىق وسىرۋمەن اينالىساتىن نەبارى 2 شارۋاشىلىق قانا تىركەلگەن. وبلىس بويىنشا دايىندالاتىن بالىق شارۋاشىلىعىن دامىتۋ باعدارلاماسىنا سارقان اۋدانى دا ۇلەس قوسۋى ءتيىس»، - دەدى ول.

بالقاش كولىنىڭ جاعاسىنا ينفراقۇرىلىم تارتسا، جاعالاۋدى دامىتسا، كاسىبىمىزدى ودان ءارى كەڭەيتەر ەدىك دەگەن لەپسىلىك تۇرعىننىڭ دا ساۋالى وزەكتى.

«دەمالىس ايماعىنا سۋ، جارىق سياقتى ينجەنەرلىك جۇيەلەر جۇرگىزۋدى باستاۋ ءۇشىن الدىمەن سول جەرگە كەلەتىن ينۆەستورلاردى انىقتاپ الۋىمىز كەرەك. تۋريستەر جالپى تالاپشىل، كىرپياز بولادى، سوندىقتان بىزگە تاجىريبەسى مول، تۋريزم سالاسىنا ماماندانعان ينۆەستورلاردى، ماسەلەن تۇرىك اعايىندار بار، الاكول جاعالاۋىندا جۇمىس ىستەيتىن تاجىريبەلى كومپانيالار بار، سولاردى تارتۋ كەرەك. مەنىڭ ورىنباسارىم ارسلان داندىبايەۆ 3-4 ايدا بۇل ءىستى رەتتەيدى دەپ ويلايمىن»، - دەدى وبلىس اكىمى.


جاڭالىقتار