قارادومالاق بالا ەرتىپ جۇرگەنىمدە جۇرت تاڭىرقاي قارايدى - قازاققا كەلىن بولعان ورىس قىزى
3 مامىر 10:34

قارادومالاق بالا ەرتىپ جۇرگەنىمدە جۇرت تاڭىرقاي قارايدى - قازاققا كەلىن بولعان ورىس قىزى

وسكەمەن. قازاقپارات - قازاق شاڭىراعىنا كەلىن بولىپ تۇسكەن ەكاتەرينا ەنەسىنىڭ ايتقانىن ەكى ەتپەي، ۇيگە كەلگەن قوناقتاردى ەت اسىپ قارسى الادى.

ونىڭ اسلان مۇحامعاليەۆپەن قوسىلعانىنا 10 جىلعا جۋىق ۋاقىت بولعان. قازاقپارات تىلشىسىنە سۇحبات بەرگەن ايەل ومىرلىك سەرىگىن وزگە ۇلتتان تابامىن دەپ ەش ويلاماعانىن جەتكىزدى.

تارباعاتايلىق جىگىتكە تۇرمىسقا شىققان

وسكەمەن قالاسىندا دۇنيەگە كەلگەن ەكاتەرينا مۇحامعاليەۆانىڭ اكەسى دە، شەشەسى دە ورىس. اۋلەتىندە، تۋعان- تۋىستارىندا باسقا ۇلتتان قىز الىسىپ، قىز بەرىسكەن ەشكىم جوق. مەكتەپ قابىرعاسىندا جۇرگەن كەزدەن-اق ادىلدىكتى جانى قالاپ، اركەز السىزگە قولۇشىن سوزعىسى كەلگەن كەيىپكەرىمىز وسكەندە پوليتسەي بولۋدى ماقسات ەتكەن. وسى ماقساتقا جەتۋ ءۇشىن شىراقبەك قابىلبايەۆ اتىنداعى ق ر ءى ءى م قوستاناي اكادەمياسىنا وقۋعا ءتۇسىپ، 2009 -جىلى ءتامامدايدى.

سودان سوڭ كىندىك قانى تامعان جەرگە قايتا ورالىپ، وۆ-156/13 كولونياسىنا جۇمىسقا تۇرعان. ومىرلىك سەرىگىن سوندا كەزدەستىردى.


«كۇيەۋىم اسلان دا ءدال وسى ۋاقىتتا وقۋىن ءبىتىرىپ، قىزمەتكە تۇرىپ جاتقان. ەكەۋىمىز دە ءتارتىپ ساقشىسىمىز. باسىندا ارىپتەس رەتىندە ارالاسىپ جۇردىك. سوسىن ءبىر-ءبىرىمىزدى ۇناتىپ، كەزدەسە باستادىق. شىنىمدى ايتسام، بۇعان دەيىن قازاق جىگىتىنە تۇرمىسقا شىعامىن دەپ ەش ويلاماپپىن»، - دەيدى 34 جاستاعى كەلىنشەك.

قىزدارىنىڭ باسقا ۇلت وكىلىمەن كوڭىل قوسقانىن بىلگەن اتا-اناسى اۋەلدە تاڭىرقاعان. الايدا بولاشاق كۇيەۋبالانى جاقىنىراق تاني كەلە، ءوز كەلىسىمدەرىن بەردى. كەلىسىم بەردى دەۋگە دە كەلمەس. سەبەبى كەزدەسىپ جۇرگەندەرىنە 3 جىلدان اسقاندا وزدەرى «قاشان ۇيلەنەسىڭدەر؟» دەپ ءجيى سۇرايتىن بولىپتى. جۇبايى تارباعاتاي اۋدانىنىڭ تۋماسى. ول جاقتىڭ حالقىندا ورىسقا ۇيلەنبەك تۇگىلى، ورىس ءتىلىن بىلەتىندەر سيرەك كەزدەسەدى. ال ەندى بالاسىنىڭ «ورىس قىزعا ۇيلەنەمىن» دەگەن ءسوزىن اكە-شەشەسىنىڭ قالاي قابىلداعانىن ەلەستەتىپ كورىڭىز.


الايدا ماحاببات اتتى ۇلى كۇش ەشتەڭەگە قارامايدى ەكەن. كەلىندى العاش كورگەن اۋلەتتىڭ ۇلكەندەرى - اسلاننىڭ اتاسى مەن اپاسى بىردەن ۇناتىپ، «بۇل قىز بالامىزدى باقىتتى ەتەدى» دەپتى. وسىدان كەيىن اكە-شەشەسى دە قارسى بولماعان. ءبىراق «يسلام ءدىنىن قابىلداۋى ءتيىس» دەگەن شارت قويعان.

«شارت بولعان سوڭ عانا ەمەس، شىن نيەتىممەن مۇسىلمان اتاندىم. قازاقى داستۇرمەن سىرعا سالۋ ءراسىمى ءوتتى. ءدۇبىرلى توي بولدى. ەكى بالامىز دۇنيەگە كەلدى. باسىندا قازاقشا سويلەي المايتىنمىن. سوسىن بالالارىممەن بىرگە ءتىلىم شىقتى (كۇلدى).

7 جىل اتا-ەنەممەن بىرگە تۇردىق. ەنەم مەنى سىناپ كورگىسى كەلدى. ايتقانىن ەتى ەتپەي، بارلىعىن ويداعىداي ىستەۋگە شامام كەلگەنشە تىرىستىم. سىناقتان وتكەن سەكىلدىمىن. سەبەبى بىردە ول «مەنىڭ كەلىنىم ەڭ كۇشتى» دەگەندە قۋانىشىم قوينىما سىيماي كەتتى. باسىندا ۇيگە قوناقتاردىڭ تىم ءجيى كەلەتىنىنە تاڭىرقاعانىم راس. ورىس حالقىندا باسقانى قويىپ تۋعان-تۋىسقانداردىڭ وزدەرى ەتەنە جاقىن ارالاسپايدى. كۇندە اياقتان تىك تۇرىپ قوناق كۇتۋ وڭايعا سوقپادى. دەسە دە ۋاقىت وتە كەلە ۇيرەنىپ كەتتىم. قازىر ءتىپتى قوناق كەلمەسە ءبىر ءتۇرلى بولىپ تۇرامىن. اسىرەسە كارانتين كەزىندە قوناقتى ساعىندىق قوي»، - دەيدى ەكاتەرينا مۇحامعاليەۆا.


«بالالارىڭىز سىزگە ۇقسامايدى»

وتباسى جۇمادا جەتى شەلپەك ءپىسىرىپ، مەشىتكە بارادى. ۇلىستىڭ ۇلى كۇنىن جىل سايىن اۋلەت بولىپ اتاپ وتەدى. ءبارى كەلىن پىسىرگەن ۇلتتىق تاعامداردان ءدام تاتادى.

«ەت اسىپ، قۋىرداق، كەسپە كوجە جاساعاندى ۇناتامىن. باۋىرساق پىسىرەمىن. ءبارىن ەنەم ۇيرەتتى. بالالارىمدى بەسىككە بولەپ، الديلەپ ءوسىردىم. تۇڭعىشىمىزدىڭ اتى - شاديار. جاسى - 8-دە. قىزىمىز جانسۋ 5-كە تولدى. ەكەۋى دە قازاق بالاباقشاسىنا باردى. ۇلىمىز قازىر 3-سىنىپتا. اكەسى سياقتى سپورتقا قىزىعادى. دزيۋدوعا قاتىسىپ ءجۇر. كەنجەمىز كوركەم گيمناستيكا ۇيىرمەسىنە بارادى»، - دەيدى ول.


قازاقتىڭ قارا دومالاق بالالارىن ەرتكەن ورىس قىزىنا كوشەدە ۇشىراسقان ادامدار اراسىندا تاڭدانىپ قارايتىندار از ەمەس كورىنەدى. بىردە بەيتانىس ايەل ۇزاق قاراپ تۇرىپ، ونى اڭگىمەگە تارتقان. «ول مەنەن «ءسىز بالا باعۋشىسىز با؟» دەپ سۇرادى. «جوق، بۇل مەنىڭ بالالارىم» دەدىم. سول كەزدە «بالالارىڭىز سىزگە ۇقسامايدى عوي» دەپ تاڭقالدى. «اكەسىنە تارتىپ قارادومالاق بوپ تۋعان عوي» دەپ كۇلە جاۋاپ قاتتىم»، - دەيدى كەيىپكەرىمىز.

قۇدالاردىڭ ارا-قاتىناسى دا جاقسى. ءار مەرەكەلەردە، تۋعان كۇندەردە ءبىر- بىرىنە حابارلاسىپ، ىزگى تىلەكتەرىن ارناپ جاتادى. وسى ۋاقىتقا دەيىن قانداي دا ءبىر تۇسىنىسپەۋشىلىك بولىپ كورگەن ەمەس. سىيلاستىقتارى جاراسقان ەكى اۋلەتتىڭ ورتاق وتىرىستارى ۇنەمى كوڭىلدى وتەدى. «جان جارىم اسلان ءاردايىم وتباسىن، بالا-شاعاسىن ويلاپ تۇرادى. ونىمەن شاڭىراق كوتەرىپ، ءومىردىڭ ىستىعى مەن سۋىعىن بىرگە قول ۇستاسىپ ءوتىپ كەلە جاتقانىما وكىنىپ كورگەن ەمەسپىن. ءبىر سالادا قىزمەت ەتكەن سوڭ ۇنەمى ءبىر-ءبىرىمىزدى قولداپ، قولپاشتاپ تۇرامىز. قازىر تۇزەتۋ مەكەمەسىندە ايەلدەر وتريادىنىڭ باستىعى بولىپ جۇمىس ىستەيمىن. اتا-ەنەم ءوز اكە-شەشەمدەي بولىپ كەتتى. ءۇي الىپ، بولەك شىققاندا قيماي قوشتاسىپ، كوزىمىزگە جاس الىستىق. 1-مامىر - قازاقستان حالىقتارىنىڭ بىرلىگى كۇنىندە بارشا ازاماتتارعا جاقسىلىق، مول تابىس تىلەيمىن. ءبىر تۋدىڭ استىنا جينالعان ءارتۇرلى ۇلت وكىلدەرى بەرەكە-بىرلىكتە تاتۋ- ءتاتتى عۇمىر كەشەيىك»، - دەيدى ەكاتەرينا.


اۆتور: تالعاتجان مۇحامەتبەك ۇلى


سونداي-اق... وقىڭىز

جاڭالىقتار