قىتايدىڭ قاراماي قالاسىندا بايگە، كوكپار، قىز قۋۋ سىندى ات ويىندارى ءوتتى - شەتەلدەگى قازاق ءتىلدى ب ا ق-قا شولۋ
8 مامىر 11:27

قىتايدىڭ قاراماي قالاسىندا بايگە، كوكپار، قىز قۋۋ سىندى ات ويىندارى ءوتتى - شەتەلدەگى قازاق ءتىلدى ب ا ق-قا شولۋ

نۇر-سۇلتان. قازاقپارات - «قازاقپارات» ح ا ا ادەتتەگىدەي شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

قازاقستان ەلشىسى ەردوعانعا سەنىم گراموتاسىن تاپسىردى - TRT


قازاقستان، ۆەتنام جانە كۋبانىڭ تۇركيا رەسپۋبليكاسىنداعى توتەنشە جانە وكىلەتتى ەلشىلەرى پرەزيدەنت رەجەپ تايىپ ەردوعانعا سەنىم گراموتاسىن تاپسىردى. تۇركيا رەسپۋبليكاسىنىڭ پرەزيدەنتى رەجەپ تايىپ ەردوعانعا استانا انكاراداعى پرەزيدەنتتىك سارايدا قازاقستان رەسپۋبليكاسىنىڭ تۇركيا رەسپۋبليكاسىنداعى توتەنشە جانە وكىلەتتى ەلشىسى ەركەبۇلان ساپيەۆتىڭ سەنىم گراموتاسىن سالتاناتتى تۇردە تاپسىرۋ ءراسىمى ءوتتى، دەپ حابارلايدى «تۇركيا راديو تەلەديدار» اقپاراتتىق اگەنتتىگى.

اتالعان ب ا ق-تىڭ دەرەگىنشە، پرەزيدەنت رەجەپ تايىپ ەردوعان قازاقستان رەسپۋبليكاسىنىڭ تۇركيا رەسپۋبليكاسىنداعى توتەنشە جانە وكىلەتتى ەلشىسى ەركەبۇلان ساپيەۆ، ۆەتنامنىڭ تۇركياداعى وكىلەتتى ەلشىسى دو سون حالي، كۋبانىڭ وكىلەتتى ەلشىسى الەحاندرو فرانسيسكو دياس پالاسيوستى جەكە- جەكە قابىلداعان.

وزبەكستان مەن قازاقستان اراسىنداعى تاۋار اينالىمى 1 ميلليارد دوللاردان استى - «ءوز ا»


ايتا كەتەيىك، 4-مامىر كۇنى قازاقستان پرەمەر- ءمينيسترى ءاليحان سمايىلوۆ پەن وزبەكستان ۇكىمەتىنىڭ باسشىسى ابدۋللا اريپوۆپەن تەلەفون ارقىلى سويلەسكەن بولاتىن.

اڭگىمەلەسۋ بارىسىندا تاراپتار ەكىجاقتى قارىم- قاتىناستى تەرەڭدەتۋدىڭ، ونىڭ ىشىندە ءوزارا ساۋدا كولەمىن ارتتىرۋدىڭ، ونەركاسىپتىك كووپەراتسيا مەن سۋ شارۋاشىلىعى سالاسىنداعى ىنتىماقتاستىقتىڭ وزەكتى ماسەلەلەرىن تالقىلادى.

بۇل تۋرالى وسى اپتادا وزبەكستاننىڭ «ءوز ا» مەملەكەتتىك اقپاراتتىق اگەنتتىگىدە حابارلادى.

ايتا كەتۋ كەرەك، ءاليحان سمايىلوۆ بيىلعى جىلدىڭ ءبىرىنشى توقسانىندا ەكى ەل اراسىنداعى تاۋار اينالىمى 1 ميلليارد دوللاردان اسقانىن، بۇل وتكەن جىلدىڭ سايكەس كەزەڭىمەن سالىستىرعاندا 27 پايىزعا ارتىق ەكەنىن ايتتى.

«سونداي- اق تاراپتار «ورتالىق ازيا» حالىقارالىق ونەركاسىپتىك كووپەراتسيا ورتالىعىن ىسكە قوسۋ سەكىلدى بۇعان دەيىن قول جەتكىزىلگەن ۋاعدالاستىقتاردى جۇزەگە اسىرۋ ماسەلەلەرىن قارادى» ، دەپ جازادى وزبەكستاندىق ب ا ق.

يلون ماسك Twitter- گە قازاق ءتىلىن ەنگىزە ما؟ - Kaznews


يلون ماسك Twitter-دى ساتىپ العان سوڭ وعان ءبىرقاتار وزگەرىس ەنگىزەتىنىن ايتتى. بۇل تۋرالى وسى اپتادا موڭعوليانىڭ Kaznews اقپاراتتىق پورتالى حابارلادى. اتالعان ب ا ق-تىڭ كەلتىرگەن دەرەگىنە سۇيەنسەك، قازىرگى كليمات داعدارىسى جايلى جالعان اقپارات بەرەتىن، كليماتتىڭ وزگەرۋى پروبلەماسىن جوققا شىعاراتىن جارنامالارعا تىيىم سالىنعانى ءمالىم بولدى.

بۇل باعىتتا جارنامالارعا عانا ەمەس، كليماتتىڭ وزگەرۋىن جوققا شىعاراتىن، ەكولوگيالىق پروبلەمانى مويىنداماي، ونىڭ اسقىنۋىنا جول اشاتىن عالىمداردىڭ ەڭبەكتەرى دە جاريالانبايدى. الەۋمەتتىك پلاتفورمانىڭ يەسى اتانىسىمەن يلون ماسك جەلى قولدانۋشىلارىنىڭ ۇسىنىستارى مەن سىنىن قابىلدايتىنىن جازعان.

موڭعوليالىق ب ا ق-تىڭ دەرەگىنشە، وسىعان وراي Twitter-دىڭ قازاق ءتىلدى قولدانۋشىلارىدا ءوز ۇسىنىستارىن ايتا باستاعان.

«قازىرگى ۋاقىتتا Twitter-دى قولدانۋشى قازاقتار، ياعني قازاق ءتىلىنىڭ جاناشىرلارى يلون ماسكتەن Twitter پلاتفورماسىنا قازاق ءتىلىن ەنگىزۋدى سۇراپ پوست جاريالادى. ولار وتىنىشتەرىن #kazakhlanguageintwitter حەشتەگىمەن «پلاتفورماعا قازاق ءتىلىن قوسىڭىزشى» دەپ جولدادى. الەمدىك يننوۆاتسيا مەن تەحنولوگيانىڭ كوش باسىندا كەلە جاتقان Twitter يەسى «ءتىلىم جوعالماسا» دەگەن قازاق جاستارىنىڭ ۇنىنە قۇلاق اسا ما؟ Twitter- گە قازاق ءتىلىن ەنگىزە مە؟ ول جاعى الداعى ۋاقىتتىڭ ەنشىسىندە»، دەپ جازدى Kaznews.

قاراماي قالاسىندا بايگە، كوكپار، قىز قۋۋ سىندى ات ويىندارى ءوتتى - «حالىق گازەتى»


قىتايدىڭ «1 مامىر» مەملەكەتتىك مەرەكەسىندە وراي شىڭجاڭنىڭ قاراماي قالاسىنىڭ تۇرعىندارى، قالا قوناقتارى ات سپورتى الاڭىندا مەرەكەنى تويلاۋعا ارنالعان «ات سپورتى ويىندارىن» تاماشالادى، دەپ حابارلايدى قىتايدىڭ « حالىق گازەتى» اقپاراتتىق پورتالى.


اتالعان ب ا ق-تىڭ كەلتىرگەن دەرەكتەرىنە سۇيەنسەك، قارامايلىدا وتكەن ات جارىسىندا شاباندوزدار اتىنا قامشى باسىپ، بىرىنەن ءبىرى وزىپ، بايگەنىڭ كورىگىن قىزدىردى.

«سولتۇستىك شىڭجاڭنىڭ قالالارى مەن ەلدى مەكەندەرىنەن كەلگەن 40-تان استام جۇيرىك تاي، قۇنان بايگەگە جانە 15 شاقىرىمدىق الامان بايگەگە قاتىستى. وسى ارالىقتا قالا تۇرعىندارى مەن تۋريستەر كوكپار، قىز قۋۋ سياقتى ۇلتتىق ويىنداردى دا تاماشالادى»، دەپ جازادى قىتايدىق ب ا ق.


مامىردىڭ سوڭىنا دەيىن «استانا كەلىسسوزدەرىنىڭ» جاڭا راۋندى وتەدى - Parstoday

بۇل تۋرالى يراندىق Parstoday اقپارات اگەنتتىگى 6-مامىر كۇنى حابارلاعان بولاتىن. رەسەي سىرتقى ىستەر ءمينيسترىنىڭ ورىنباسارى جانە باتىس ازيا بويىنشا ارنايى وكىلى بەيسەنبى كۇنى «استانا كەلىسسوزدەرىنىڭ» جاڭا راۋندى وسى ايدىڭ سوڭىندا (مامىردا) قازاقستاننىڭ استاناسى نۇر-سۇلتاندا وتەدى دەپ ۇمىتتەندى، دەپ حابارلادى Parstoday.

يراندىق ب ا ق-تىڭ مالىمەتى بويىنشا، ميحايل بوگدانوۆ استانا كەلىسسوزدەرىنىڭ جاڭا راۋندىن وتكىزۋ تۋرالى العاشقى كەلىسىمگە وسى ايدىڭ سوڭىندا قول جەتكىزىلگەنىن مالىمدەدى. بۇل ماسەلەگە بايلانىستى تەھران، انكارا جانە سيريا باسشىلارىمەن كەلىسسوزدەر جۇرگىزىلدى. «ساراپشىلار دەڭگەيىندەگى استانا وتىرىسىنىڭ سوڭعى وتىرىسى وتكەن جىلدىڭ جەلتوقسان ايىندا نۇر- سۇلتان قالاسىندا وتكەن بولاتىن. يران، تۇركيا جانە رەسەي «استانا ۇدەرىسىنىڭ» كەپىلى رەتىندە سيريا داعدارىسىن شەشۋگە كۇش سالۋدا»، دەپ جازادى Parstoday اقپارات اگەنتتىگى.

ايتا كەتەيىك، يراندىق ب ا ق بۇل اقپاراتىن Tasnim-گە سىلتەمە جاساپ حابارلاعان بولاتىن.

قازاق - قىتاي ديپلوماتيالىق قارىم- قاتىناسىنىڭ 30 جىلدىعىنا وراي كىتاپ الماسۋ سيمپوزيۋمى ءوتتى - «حالىق گازەتى»


اپتا باسىندا قىتايلىق «people.cn» پورتالىندا وسىنداي تاقىرىپتاعى اقپارات جاريالاندى. قازاقستاننىڭ استاناسى نۇر-سۇلتان قالاسىندا V ەۋرازيا حالىقارالىق كىتاپ كورمەسى بولدى. وسىعان وراي «ءوزارا قولداۋ جانە ىنتىماق ارقىلى تەڭ ۇتىسقا جەتۋ - قىتاي مەن قازاقستان اراسىنداعى ديپلوماتيالىق قارىم- قاتىناستارىنىڭ 30 جىلدىعىنا ارنالعان كىتاپ الماسۋ سيمپوزيۋمى» ونلاين جانە وفلاين رەجيمدە ءوتتى، دەپ حابارلايدى «حالىق گازەتى».


اتالعان جينالىستا قىتايدىڭ ۇگىت-ناسيحات مينيسترلىگى يمپورت جانە ەكسپورت باسقارماسى ديرەكتورىنىڭ ورىنباسارى جاو حايۋن ينتەرنەت ارقىلى ونلاين قاتىسىپ ءسوز سويلەدى.


وندا ول قىتاي مەن قازاقستان اراسىندا وسىدان 30 جىل بۇرىن ديپلوماتيالىق قارىم-قاتىناس ورناتقاننان بەرى ەكى ەلدىڭ باسپا ءىسى سالاسىنداعى ىنتىماقتاستىعى مولايعانىن جانە جەمىستى ناتيجەلەرگە قول جەتكىزگەنىن ايتقان.

قىتايلىق ب ا ق-تىڭ دەرەگىنشە، اتالعان جينالىستا قازاقستاندىق تاراپ ق ر مادەنيەت جانە سپورت مينيسترلىگى باسپا ءىسىن باسقارۋ دەپارتامەنتى ديرەكتورىنىڭ ورىنباسارى جاقىپوۆتىڭ ءسوزىن وقىعان.

جاقىپوۆ ءوز سوزىندە سوڭعى جىلدارى قازاق سينولوگتارى قىتاي تىلىندەگى كوپتەگەن تاماشا كىتاپتاردى اۋدارعانىن، قازاق وقىرماندارى دا قىتايدىڭ زاماناۋي ەكونوميكالىق جانە الەۋمەتتىك جاعدايلارىن باياندايتىن، قىتايدىڭ شىنايى ومىرىمەن تانىستىراتىن ەڭبەكتەردى كوبىرەك كورگىسى كەلەتىنىن جەتكىزدى.

«سونداي- اق، قىتايلىق جانە قازاقستاندىق عالىمدار، اۋدارماشىلار مەن باسپاگەرلەر ءوزارا بىرىگىپ، كىتاپ اياسىندا قىتاي مەن قازاقستان اراسىنداعى دوستىق كوپىرىن سالىپ، ەكى ەلدىڭ مادەني الماسۋىنا كوبىرەك ۇلەس قوسۋدى ءۇمىت ەتەتىنىن ءبىلدىردى»، دەپ جازدى قىتايلىق ب ا ق.

ايتا كەتەيىك، قازاقستاندىق باسپا مەكەمەلەرىنىڭ وكىلى اداي ساكەن ۇلى قىتاي باسپالارىمەن بىرلەسە كىتاپ باسىپ شىعارۋداعى كوپ جىلعى تاجىريبەسىمەن ءبولىسىپ، قازاقستاندا جارىق كورىپ جاتقان قىتاي تاقىرىبىنداعى كىتاپتاردىڭ اكادەميالىق جانە نارىقتىق قۇنىمەن تانىستىرعان. «سيمپوزيۋمدا سونداي-اق ق ك پ و ك پارتيا مەكتەبى پارتكومىنىڭ بۇرىنعى مۇشەسى، ءبىرىنشى دارەجەلى پروفەسسور حان سينسياننىڭ «قىتاي جولى الەمگە نە سىيلايدى» كىتابىنىڭ قازاقشا نۇسقاسى تاراتىلدى. سونداي-اق جەنمين (حالىق) ۋنيۆەرسيتەتى باسپاسى قازاقستاننان شىعارعان 60-تان استام ورىس جانە قازاق تىلىندەگى كىتاپتار كورسەتىلىمى بولدى»، دەپ تۇيىندەيدى «حالىق گازەتى».

اۆتور: بەيسەن سۇلتان، ءتىلشى

جاڭالىقتار