قازاقستاندىق بالۋان قىز تۇركيادا وتكەن تۋرنيردە ۇزدىك ۇشتىكتەن كورىندى
17 مامىر 09:24

قازاقستاندىق بالۋان قىز تۇركيادا وتكەن تۋرنيردە ۇزدىك ۇشتىكتەن كورىندى

نۇر-سۇلتان. قازاقپارات - قازاقستاندىق بالۋان قىز تۇركيادا وتكەن Victory Cup تۋرنيرىندە قولا مەدال جەڭىپ الدى، دەپ حابارلايدى قازاقپارات ءتىلشىسى ماڭعىستاۋ وبلىسى بويىنشا ايەلدەر كۇرەسىنەن اعا جاتتىقتىرۋشى انار حاميتوۆاعا سىلتەمە جاساپ.

جاتتىقتىرۋشىنىڭ ايتۋىنشا، ماڭعىستاۋلىق بالۋان قىز ءاليا داۋلەت تۇركيادا وتكەن Victory Cup حالىقارالىق تۋرنيرىندە قولا مەدال جەڭىپ الدى.

بايراقتى باسەكەگە الەمنىڭ ءتۇرلى ەلىنەن گرەك- ريم، ەركىن جانە ايەلدەر كۇرەسىمەن شۇعىلداناتىن 500-دەي جاس سپورتشى كەلگەن. اتاپ ايتساق، فرانسيا، لاتۆيا، يران، ازەربايجان، تۇركيا، گرۋزيا جانە قازاقستاننان بالۋاندار باق سىناعان.

«بۇل دودا ءبىزدىڭ بالۋان ءۇشىن ازيا چەمپيوناتىنىڭ الدىندا جاقسى سىن بولدى. ءبىزدىڭ سپورتشىنىڭ تاباندىلىعى، ەرىك-جىگەرى جەڭىسكە جەتەلەدى. ونىڭ وسى قاسيەتتەرى الداعى ايتۋلى جارىستاردا دا جەڭىس تۇعىرىنا كوتەرىلۋگە كومەكتەسەدى دەپ سەنەمىز. ەندىگى قاتىساتىن ءتۋرنيرىمىز 3-18-ماۋسىم ارالىعىندا وتەدى. بۇگىن بوي الدىرعان قاتەلىكتەرگە جول بەرمەۋگە تىرىسامىز»، - دەدى انار حاميتوۆا. 46 كەلى سالماقتا ونەر كورسەتكەن ءاليا قولا مەدال ءۇشىن تالاستا تۇركيالىق بالۋانمەن بەلدەسىپ، باسىم ءتۇستى.

اۆتور: ەربول جانات

جاڭالىقتار