اتوم ستانساسى بۇكىل پروبلەمانىڭ داۋاسى بولا المايدى - بولات اقشولاقوۆ
20 مامىر 15:49

اتوم ستانساسى بۇكىل پروبلەمانىڭ داۋاسى بولا المايدى - بولات اقشولاقوۆ

نۇر- سۇلتان. قازاقپارات - ەلوردا تۇرعىنى ق ر ەنەرگەتيكا ءمينيسترى بولات اقشولاقوۆتان اتوم ەلەكتر ستانساسىن سالۋعا قاتىستى پايىمىن سۇرادى، دەپ حابارلايدى قازاقپارات ءتىلشىسى.

«ا ە س بويىنشا نە ەستىگىڭىز كەلىپ وتىرعانىن تۇسىنبەدىم. جەكە پىكىرىمدى بىلگىڭىز كەلسە، ايتايىن. بىزگە اتوم ەلەكتر ستانساسى كەرەك. بۇرىنعى كولەمدە كومىر قولدانا بەرۋىمىزگە بولمايدى. كومىر ستانسالارىنا ەشكىم قارجى سالمايدى قازىر. وكىنىشكە قاراي، گاز تۇتىنۋدىڭ مۇمكىندىكتەرىن وزدەرىڭىز كورىپ وتىرسىزدار. بارعان سايىن ازايىپ كەلەدى. ەگەر جاڭا كوزدەردى اشىپ، يگەرۋ ءۇشىن اقشا سالماساق، گاز تاپشىلىعى بولادى»، - دەدى بولات اقشولاقوۆ.

ءمينيستردىڭ ويىنشا، ا ە س سالۋدان تۋىنداۋى ىقتيمال تاۋەكەلدەردى باقىلاۋدا ۇستاۋعا بولادى.

«اتوم ستانساسى بۇكىل پروبلەمانىڭ داۋاسى بولا المايدى، ارينە. ءبىراق، ول - تۇراقتى، سىناقتان وتكەن كوز بولار ەدى. ءيا، وعان قارسى ادامدار بار. ءتۇرلى ۇرەي بار دەۋگە بولادى. قازاقستاندا بۇل ماسەلەگە كەڭەس زامانىنداعى يادرولىق پوليگونمەن سالىستىرمالى تۇردە قارايدى دەگەندەي. مەن ونى تۇسىنەم، نەگىزسىز دە ەمەس شىعار. ءبىراق، ازاماتتىق ەنەرگەتيكا تۇرعىسىنان ايتارلىقتاي قاتەرى جوق نەگىزى. كەز كەلگەن ءىستىڭ ءوز تاۋەكەلى بولادى. ءتىپتى، سۋ ىشسەڭىز دە، ءتۇرلى تاۋەكەلى بار. ەسەپتى دۇرىس جۇرگىزىپ، تاۋەكەلدەردى باسقارا الۋ كەرەك. ءبىز قازىر سول ەسەپتى جۇرگىزىپ جاتىرمىز. قايتالاپ ايتايىن، اتوم ستانساسى - بولاشاقتاعى ەلەكتر تاپشىلىعىن شەشۋدىڭ وتە جاقسى جولى بولا الادى»، - دەدى مينيستر.

سونداي- اق، بولات اقشولاقوۆ ب ا ق وكىلدەرىنە ەلدىڭ سولتۇستىگى مەن شىعىسىنداعى وڭىرلەردى گازداندىرۋ مۇمكىندىكتەرى تۋرالى مالىمەت بەردى.

اۆتور: ەسىمجان ناقتىباي

جاڭالىقتار