«بالالار ۇرەيلەنە قارايدى»: جارتى بەتى كۇيگەن قىز الەۋمەتتىك جەلىنىڭ جۇلدىزىنا اينالدى
26 مامىر 11:55

«بالالار ۇرەيلەنە قارايدى»: جارتى بەتى كۇيگەن قىز الەۋمەتتىك جەلىنىڭ جۇلدىزىنا اينالدى

نۇر-سۇلتان. قازاقپارات - اسەل سۇلەيمەنوۆانى ءوز ورتاسى اشىق مىنەزدى، بەلسەندى قىز رەتىندە تانيدى.

ادام جاتىرقاماي، وزگەلەرمەن تەز ءتىل تابىساتىن بويجەتكەن 7 ايلىق كەزىندە وشاقتا جانىپ جاتقان وتقا بايقاۋسىزدا ءتۇسىپ كەتكەن. ابىروي بولعاندا اسەلدىڭ اناسى قىزىن جالىننان ۋاقىتىندا الىپ شىعىپتى. ءبىر جاق بەتىن كۇيىك شالىپ، سۇيكىمدى نارەستەنىڭ ۇسقىنى بۇزىلعان. العاشىندا بالالىقپەن ءمان بەرمەگەنىمەن وسە كەلە اسەل ءۇشىن بۇل ۇلكەن پروبلەماعا اينالدى. ۇنەمى جارتى بەتىن جاسىرىپ جۇرەتىن قىز بۇگىنگە دەيىن ءتورت رەت وتا جاساتىپ، سوڭعى وتادان كەيىن بەت- الپەتى ءبىرشاما ورنىنا كەلگەنىن ايتادى. قازىر ول ءوز بەينەسىن قابىلداپ كەلەدى. ەش قىمسىنباي TikTok تۇسىرەدى. الەۋمەتتىك جەلىدە بەلسەندىلىك تانىتۋىم ءوزىمدى وسى قالپىمدا قابىلداۋداعى نەگىزگى قادامدارىمنىڭ ءبىرى بولدى، دەيدى ول.

Azattyq R‎hy ءتىلشىسى اسەلدىڭ وزىنە حابارلاسىپ، جەلىدەگى بەلسەندىلىگى، دەنساۋلىعى مەن بولاشاققا جوسپارى جايىندا اڭگىمەلەستى.


«بەتىمدى ۇيالماي كورسەتىپ جۇرگىم كەلەدى...»

اسەلدىڭ تەرىسى كۇن وتە وزگەرىپ جاتقاندىقتان ونىڭ بەتىن تولىق قالپىنا كەلتىرۋ ءۇشىن ۇزاق ۋاقىت قاجەت. ونىڭ ۇستىنە كۇيىككە جاسالاتىن وتانىڭ باعاسى دا تىم قىمبات. شەتەلگە شىعۋدى تالاپ ەتەدى. بويجەتكەن جەلىدە العاش «استارلى اقيقات» باعدارلاماسىنا كەيىپكەر بولعاننان كەيىن تانىلعانىن ايتتى.

«ءوزىم الماتى وبلىسى ەڭبەكشىقازاق اۋدانى، ەسىك قالاسىنىڭ تۋماسىمىن. قازىر جاسىم 15-تە. وسىدان ءبىر جىل بۇرىن تۋىس اپكەمىز مەنىڭ جاعدايىمدى ايتىپ «استارلى اقيقات» باعدارلاماسىنا حابارلاستى. باعدارلاماعا بارىپ، العاش كوپشىلىككە ءوز بەينەمدى كورسەتتىم. باعدارلامادان كەيىن مەنىڭ وتاما قاراجات جينالىپ، الماتىدا كەزەكتى وتا جاساتتىم. وتە قيىن بولدى. اۋىرعانىنا قاراماستان شىداپ شىقتىم. قازىر بەتىم ءبىرشاما قالىپقا كەلدى.

قىز بالا بولعاننان كەيىن ءوزىمدى ىشتەي قانشا قامشىلاسام دا بەتىمنەن ۇيالاتىن كەزدەر بولادى. بۇرىندارى كوپشىلىككە شىققاندا ۇنەمى شاشىممەن جاراقاتتانعان بەتىمدى جاۋىپ جۇرەتىنمىن. كوشەگە شىقسام تومەن قاراپ نەمەسە كۇننەن قورعايتىن كوزىلدىرىك كيىپ ءجۇردىم. شىنىمدى ايتسام ۇنەمى تىعىلىپ جۇرۋدەن شارشادىم. ءالى دە بولسا ءوزىمدى تولىق قابىلدادىم دەپ ايتا المايمىن. كىشكەنتاي بالالار اناسىنا مەنى مەڭزەپ شوشىپ قاراعاندا ۇيالىپ كەتەمىن، ءبىراق بارىنشا ەلدىڭ سوزىنە ءمان بەرمەۋگە تىرىسامىن»، - دەيدى ول.

اسەلدىڭ دوستارى وتە كوپ. اناسى ونىڭ ءوز ورتاسىندا وتە بەلسەندى، مەكتەپتە ۇزدىك وقۋشىلاردىڭ ءبىرى ەكەنىن ايتادى. اناسى مەن وزىنەن كەيىن ەرگەن ءسىڭلىسى، تۋىستارىنىڭ قولداۋى جاس ءوسپىرىم قىزدىڭ بۇگىنگە دەيىن تۇيىقتالماي، اشىق بولۋىنا سەبەپ بولعان.


«اسەل - مەنىڭ تۇڭعىشىم. ءبىر مەزەتكە كوزىمنەن تاسا قىلىپ العانىمنان قىزىم وسىنداي جاراقات الدى. ءالى كۇنگە دەيىن جۇرەگىم اۋىرادى. قانداي انا بالاسىنا جاماندىق تىلەيدى؟! جاعداي وسىلاي بولدى. دەسە دە، قولىمنان كەلگەنشە قولداۋىمدى بىلدىرەمىن. قاي كەزدە دە، قىزىمدى جىگەرلەندىرىپ سۇلۋلىق تەك سىرتقى كەلبەتتە ەمەس ەكەنىن تۇسىندىرۋگە تىرىسىپ كەلەمىن»، - دەيدى اسەلدىڭ اناسى.

ونىڭ ينستاگرام جەلىسىندە 22 مىڭنان استام وقىرمانى بار. العاشىندا جاعىمسىز پىكىر كوپ بولعانىمەن قازىر وقۋشى قىزدى قولدايتىنداردىڭ قاتارى كوپ.

«باستاپقى ۋاقىتتا جەلىگە شىعۋعا جۇرەكسىندىم. قاراپايىم كوشەدە ۇيالىپ جۇرگەندە قانشاما ادامنىڭ الدىنا شىعۋ مەن ءۇشىن قورقىنىش بولدى. انامنىڭ قولداۋىنىڭ ارقاسىندا قورقىنىشىم باسىلدى. مەيىرىمدى ادامدار جاقسى قابىلدادى. بەتىمدى جاپپاۋىمدى سۇراپ، تابيعي ادەمىلىگىمدى ۇنەمى ايتىپ وتىراتىن وقىرماندارىم بار. دەسە دە، جاعىمسىز پىكىرلەر دە از بولمادى. «قورقىنىشتىسىڭ، ۆيدەو ءتۇسىرۋ نە تەڭىڭ، ۇيدە وتىر» دەگەن اۋىر سوزدەر كوپ بولدى. العاشىندا وقىپ تۇنىمەن جىلاپ شىعاتىنمىن. كەيىن بارىنە ۇيرەندىم»، - دەيدى ول.

الەۋمەتتىك جەلىنىڭ ىقپالى تۋرالى

TikTok-قا تەك حوببي رەتىندە قارايمىن دەگەن اسەل جەلىنىڭ قازىرگى مۇمكىندىگىنە كەڭىنەن توقتالدى. ونىڭ وزىنە دەگەن سەنىمدىلىگىن ارتتىرۋعا جەلىنىڭ سەپتىگى كوپ بولعان.

«وزىممەن قاتارلاس بالالاردىڭ كوبى TikTok-قا اۋەس. ءوزىم قولىم بوس كەزدە عانا ۆيدەو تۇسىرەمىن. قازىرگى جاستاردىڭ TikTok-قا قىزىعۋىنىڭ باستى سەبەبى، TikTok ارقىلى ۇسىنىس بولىمىنە شىعىپ وقىرمان جينايدى. وقىرماندارىنىڭ جارتىسى Instagram-عا تىركەلەدى. وسىلايشا، اۋديتوريا جيناپ بلوگەر بولۋعا مۇمكىندىك بار. TikTok-تىڭ بەرەر پايداسى كوپ دەپ ايتپاس ەدىم. ءوزىنىڭ ىشىندەگى جۇيەسىنە سايكەس قوسىمشانى قولدانۋشىلار ستريمعا كىرىپ ياعني، اۋديو نەمەسە ۆيدەو اقپاراتتى تاراتۋ ارقىلى ءبىر-بىرىمەن باتلعا شىعادى. ونى كورىپ وتىرعاندار ءتۇرلى سىيلىقتار جىبەرەدى. ستريم اياقتالعاننان كەيىن ونلاين سىيلىقتاردى جيناپ TikTok دوللار بەرىپ وتىرادى. 100 دوللارعا جەتكەن كەزدە ونى شەشىپ الۋعا بولادى»، - دەيدى اسەل.

اسەلدىڭ جاسى نەبارى 15-تە بولسا دا ەرەسەك ادامدارشا ويلاپ، ويىن تولىق، سەنىمدى جەتكىزۋگە ۇيرەنگەن. ول ءوز تۇسىنىگىندەگى ادەمىلىكتى بىلايشا سيپاتتاپ بەردى.

«مەن ءۇشىن ادەمىلىك سىرت كەلبەت ەمەس ادامنىڭ جان دۇنيەسى. بۇل پىكىردىڭ ءوزىمنىڭ بەت- الپەتىمە ەش قاتىسى جوق.

«ادامنىڭ سىرت كەلبەتىنە قاراپ العاش باعا بەرگەن - ءىبىلىس» دەگەن ءسوز بار. مەن بۇل تۇجىرىممەن تولىقتاي كەلىسەمىن. جۇرەگىندە يمانى، جاقسى نيەتى مەن ادامگەرشىلىگى بولماسا، جىلتىراعان بەتتەن كەلەتىن پايدا جوق دەپ ويلايمىن. جان دۇنيەسى سۇلۋ ادامنىڭ قاسىندا تۇرىپ تىلدەسۋدىڭ ءوزى ۇلكەن عانيبەت. سوندىقتان ادامنىڭ سىرتقى بەينەسىنەن بۇرىن ىشكى دۇنيەسىنە ءۇڭىلۋدى ۇمىتپاۋ قاجەت. مەنىڭ قاسىمدا جۇرگەن دوستارىم، مەنى قارايتىن وقىرماندارىمنىڭ قولداۋىنا، انامنىڭ بارىنا شۇكىرشىلىك ەتەمىن»، - دەيدى ول.


اسەل بيىل 9-سىنىپتى ءبىتىرىپ، مۇعالىم ماماندىعىنا بارۋدى جوسپارلاپ وتىرعانىن ايتتى. سونداي- اق وقۋشى قىز ءوزى سەكىلدى جانداردى ءبىرىنشى كەزەكتە ۇيالماۋعا شاقىردى.

«كىشكەنتاي بالالاردى ەرەكشە جاقسى كورگەندىكتەن بولار، باستاۋىش سىنىپ مۇعالىمى بولامىن دەپ شەشتىم. تۇسىنىگى، ومىرگە دەگەن كوزقاراسى ەندى قالىپتاسىپ جاتقان بۇلدىرشىندەرگە ساباق بەرۋ، ولاردى جاقسى دۇنيەگە ۇيرەتۋ ماڭىزدى دەپ ويلايمىن. وسى باعىتتا كاسىبىمدى جالعاعىم كەلەدى.

سونداي-اق مەن سەكىلدى ەرەكشەلىگى بار، ءبىراق ءوزىن قابىلداي الماي جۇرگەن جاندارعا ۇيالماڭىزدار دەگىم كەلەدى. ءبىز ۇيالىپ، تومەن قاراي بەرمەۋىمىز كەرەك. سەبەبى اللا سىناقتى تەك كوتەرە الاتىن جانعا بەرەدى. باسقا تۇسكەن كەز- كەلگەن جاعدايعا شىداي ءبىلۋ كەرەك. ءوزىڭىزدى بار بولمىسىڭىزبەن جاقسى كورگەن دۇرىس. باقىتتى بولۋ ءۇشىن تەك سۇلۋ بولۋ جەتكىلىكسىز»، - دەيدى وقۋشى قىز.


وتاندىق دارىگەرلەر اسەلدىڭ جاراقاتى كۇردەلى ەكەنىن، قوماقتى قاراجاتتى قاجەت ەتەتىنىن ايتادى. وقۋشى قىزدىڭ جاعدايىن ونىڭ الەۋمەتتىك جەلىدەگى پاراقشاسى ارقىلى بايلانىسىپ، بىلۋگە بولادى.

سونداي-اق... وقىڭىز

جاڭالىقتار