استانالىق پوليسەيلەر قاتتى مۋزىكا جانە تۇنگى شۋمەن قالاي كۇرەسىپ جاتىر
26 مامىر 17:04

استانالىق پوليسەيلەر قاتتى مۋزىكا جانە تۇنگى شۋمەن قالاي كۇرەسىپ جاتىر

نۇر- سۇلتان. قازاقپارات - جاز مەزگىلى كەلىسىمەن قالا جۇرتشىلىعى كۇندىز جانە كەشقۇرىم ءۇيدىڭ تەرەزەسىن اشىپ قوياتىنى بەلگىلى.

وسىنداي كەزدە دالاداعى قاتتى قويىلعان مۋزىكا مەن كوشەدەگى شۋلاعان ادامدار مازانى الىپ جاتادى. وسى ورايدا استانالىقتاردىڭ تىنىشتىعىن قورعاۋ شارالارىنا قاتىستى قازاقپارات ءتىلشىسى نۇر- سۇلتان قالالىق پوليتسيا دەپارتامەنتىنە جۇگىنگەن ەدى.

قالالىق پوليتسيا دەپارتامەنتى بۇل پروبلەمادان حاباردار. سول سەبەپتى كۇندەلىكتى الدىن الۋ شارالارىن وتكىزەدى.

«پاترۋلدىك پوليسەيلەر بەكىتىلگەن باعىتپەن كۇندەلىكتى كەشكە جانە تۇندە اۋلالاردى جاياۋ جانە كولىكپەن ارالايدى. سونىمەن قاتار پروفيلاكتيكالىق ءىس- شارالار كەزەڭىندە ۋچاسكەلىك پوليتسيا ينسپەكتورلارى اۋلالاردى تۇنگى ۋاقىتتا شولىپ شىعادى»، - دەگەن جاۋاپ بەرىلدى ساۋالعا.

ونىمەن قوسا، ەسىل اۋدانىنىڭ پوليتسيا باسقارماسىندا وتكەن بريفينگى الدىندا قالالىق پوليتسيا دەپارتامەنتىنىڭ رەسمي وكىلى نۇرالى تاڭىربەرگەنوۆ اۋلالاردى ارالاۋ ەرەجەسىن ءتۇسىندىرىپ بەردى.

«كۇن سايىن ۋچاسكەلىك بەكەتتە كەزەكشى جانە اۆتوپاترۋلدىك پوليسەي جۇمىس ىستەيدى. ولار كۇندىزگى شاقىرتۋلارعا جاۋاپ بەرەدى. شاقىرتۋ العان ساتتە جانە شاقىرتۋ جوق كەزدە دە پوليسيا ينسپەكتورلارى اۋلا ارالاپ، پاترۋل جاسايدى»، - دەيدى ول.

ونىڭ ايتۋىنشا، قازىرگى ۋاقىتتا پاترۋلدىك ارالاۋ نەگىزىنەن كريمينوگەندىك جاعداي ءجيى بولاتىن اۋدانداردا جۇرەدى.

«تۇرعىنداردىڭ 99 پايىزىن باسقا وڭىردەن كەلگەندەر، ياعني پاتەر جالداۋشىلار قۇرايتىن تۇرعىن ءۇي كەشەندەرى بار. ونداي تۇرعىن ءۇي كەشەندەرىندە ۇنەمى ۇرىس- كەرىس، ايقاي- شۋ بولىپ جاتادى»، - دەيدى ول.

اۆتور: ءالي يبرايەۆ

جاڭالىقتار