كۇش- جىگەرىمىز ساۋدا- ەكونوميكالىق ىنتىماقتاستىقتى دامىتۋعا باعىتتالۋى ماڭىزدى – توقايەۆ
27 مامىر 17:47

كۇش- جىگەرىمىز ساۋدا- ەكونوميكالىق ىنتىماقتاستىقتى دامىتۋعا باعىتتالۋى ماڭىزدى – توقايەۆ

نۇر- سۇلتان. قازاقپارات – ە ا ە و قۇرىلعاننان بەرى قازاقستاننىڭ ءوزارا ساۋدا اينالىمى 33 پايىزعا، ەكسپورتى 55 پايىزعا ارتتى.

بۇل تۋرالى مەملەكەت باسشىسى قاسىم- جومارت توقايەۆ جوعارى ەۋرازيالىق ەكونوميكالىق كەڭەستىڭ وتىرىسىندا ايتتى، دەپ حابارلايدى قازاقپارات ءتىلشىسى.

«قازىرگى گەوساياسي سىلكىنىستەر الەمدىك ەكونوميكانىڭ دامۋىنا ەلەۋلى تۇزەتۋلەر ەنگىزدى. بيىل حالىقارالىق ۆاليۋتا قورى الەمدىك ەكونوميكانىڭ ءوسۋ بولجامىن 3,6 پايىزعا دەيىن، ال دۇنيەجۇزىلىك ساۋدا ۇيىمى 2,8 پايىزعا دەيىن تومەندەتتى. جاھاندىق جانە وڭىرلىك سىن- تەگەۋرىندەر جاعدايىندا ە ا ە و- عا مۇشە ەلدەردىڭ بىرلەسكەن كۇش- جىگەرىنىڭ ارقاسىندا الەۋمەتتىك- ەكونوميكالىق كەدەرگىلەر ويداعىداي ەڭسەرىلىپ، ماكروەكونوميكالىق تۇراقتىلىق پەن ءوسۋ سەرپىنى قامتاماسىز ەتىلىپ جاتىر. سىرتقى ساۋدا سالاسىنداعى ەلەۋلى جەتىستىكتەر تۋرالى ارىپتەستەرىم ايتتى. ءوز كەزەگىمدە ايتارىم، وداق قۇرىلعان ساتتەن باستاپ قازاقستاننىڭ ءوزارا ساۋداسى 33 پايىزعا ارتتى. ال ەكسپورتى 55 پايىزعا ارتتى»، - دەدى قاسىم- جومارت توقايەۆ.

سونىمەن بىرگە پرەزيدەنت قازاقستاندا 15 مىڭنان استام بىرلەسكەن كاسىپورىن جۇمىس ىستەيتىنىن جانە ولاردىڭ سانى ارتىپ جاتقانىن جەتكىزدى.

«بۇل قۋانىشتى قۇبىلىس، كورسەتكىشتەر ءبىزدىڭ ينتەگراتسيالىق ءوزارا ءىس- قيمىلىمىزدىڭ تابىستى ەكەنىن كورسەتەدى. جالپى ءبىزدىڭ ازاماتتارىمىزدىڭ يگىلىگى ءۇشىن كۇش- جىگەرىمىز ساۋدا- ەكونوميكالىق ىنتىماقتاستىقتى سەرپىندى دامىتۋعا باعىتتالۋى ماڭىزدى دەپ سانايمىن. بۇل - جاھاندىق سىن- تەگەۋرىندەرگە قارسى ۇجىمدىق يممۋنيتەتىمىزدىڭ نىعايۋىنىڭ كەپىلى»، - دەدى قازاقستان پرەزيدەنتى.

اۆتور: ايجان سەرىكجان قىزى

جاڭالىقتار