قانات بوزىمبايەۆ ۇيعىر اۋدانىنىڭ اتاۋىن وزگەرتۋگە قاتىستى پىكىر ءبىلدىردى
31 مامىر 15:43

قانات بوزىمبايەۆ ۇيعىر اۋدانىنىڭ اتاۋىن وزگەرتۋگە قاتىستى پىكىر ءبىلدىردى

تالدىقورعان. قازاقپارات - الماتى وبلىسىنىڭ اكىمى قانات بوزىمبايەۆ ۇيعىر اۋدانىنىڭ حالقىمەن كەزدەسىپ، تۇرعىنداردىڭ ساۋالىنا جاۋاپ بەرىپ، اتقارىلىپ جاتقان جۇمىستار جونىندە باياندادى، - دەپ حابارلايدى قازاقپارات ءتىلشىسى الماتى وبلىسى اكىمىنىڭ باسپا ءسوز قىزمەتىنە سىلتەمە جاساپ.

«ۇيعىر اۋدانىنىڭ اتاۋىن اۋىستىرۋ تۋرالى ساۋالعا بەرگەن جاۋابىندا الماتى وبلىسىنىڭ اكىمى وتكەن جىلدىڭ جەلتوقسان ايىندا بولعان تۇرعىندارمەن كەزدەسۋىندە اقساقالدار وسى ماسەلەنى كوتەرگەنىن، اۋداننىڭ ءتول تاريحي اتاۋىن انىقتاۋ ءۇشىن عالىمداردىڭ دا بۇل ىسكە قوسىلۋىن سۇراعانىن ايتتى. سوعان بايلانىستى ءتىل جانە شوقان ءۋاليحانوۆ اتىنداعى تاريح جانە ەتنولوگيا ينستيتۋتتارى جاساعان ساراپتاما ءتيىستى مەملەكەتتىك ورگانعا ۇسىنىلعانىن جەتكىزدى. ازىرشە ناقتى ءبىر ساياسي شەشىم جاسالعان جوق. دەگەنمەن قازىر الدىن الا جۇمىستار جۇرگىزىلىپ جاتىر»، - دەلىنگەن اتالعان ۆەدومستۆونىڭ باسپا ءسوز قىزمەتى تاراتقان اقپاراتتا.

الماتى وبلىسىنىڭ اكىمى قانات بوزىمبايەۆپەن كەزدەسۋ بارىسىندا جەرگىلىكتى پەداگوگتەر 550 ورىندىق مەكتەپتە 600 دەن استام بالا وقىپ جاتقانىن، وعان قوسا عيماراتتا ونەر مەكتەبىن اشۋ جوسپارلانىپ وتىرعانىن جەتكىزدى.

ولار بۇل وقۋ پروتسەسىنە كەدەرگى كەلتىرەدى دەپ ەسەپتەيدى. وبلىستىق ءبىلىم باسقارماسى باسشىسىنىڭ مىندەتىن اتقارۋشى جاڭىل سۇلەيمەنوۆانىڭ ايتۋىنشا، بالالارعا قوسىمشا ءبىلىم كەرەك، ۇيىرمەلەر قىزمەتىن ۇيىمداستىرۋ ءالى دە قاراستىرىلىپ جاتىر.

اتاپ ايتقاندا، وسى مەكتەپتىڭ بازاسىندا مەكتەپكە دەيىنگى شاعىن ورتالىق جۇمىس ىستەگەن، وبلىستا قوسىمشا ءبىلىم بەرۋ دەڭگەيىنىڭ تومەن ەكەنىن ەسكەرىپ، وسى باعىتتى دامىتۋدىڭ ءتۇرلى جولدارى قاراستىرىلىپ جاتىر.

تۇرعىندار مەملەكەتتىك تۇرعىن ءۇي قورىنان ءۇي الۋ ماسەلەسىن دە وزەكتى دەيدى. بۇل تاراپتان حالىقتى اۋدان باسشىلىعىنىڭ جۇمىسى قاناعاتتاندىرمايدى.

قانات بوزىمبايەۆ كوپتىڭ پىكىرىمەن كەلىسەتىنىن ايتىپ، ءوز بايانداماسى بارىسىندا اۋدان اكىمىنە وسى ماسەلەگە باسار نازار اۋدارۋدى تاپسىردى.

اتاپ وتسەك، اۋداندا تۇرعىن ءۇي كەزەگىندە 1160 ادام تۇر. وتكەن جىلى اۋداندا 8,5 مىڭ شارشى مەتر تۇرعىن ءۇي سالىنىپ، پايدالانۋعا بەرىلدى. بيىل 14 مىڭ شارشى مەتر تۇرعىن ءۇي سالۋ جوسپارلانعان. شونجى اۋىلىندا جىل سوڭىنا دەيىن 60 پاتەرلى تۇرعىن ءۇي پايدالانۋعا بەرىلەدى. تاعى ءبىر كرەديتتىك تۇرعىن ءۇي سالۋعا 1 ميلليارد تەڭگە ءبولىنىپ، كونكۋرستىق راسىمدەر باستالدى.

اۋدان اكىمىنىڭ ايتۋىنشا، كەلەسى جىلى تۇرعىن ۇيلەر ءۇشىن 20 جەر ۋچاسكەسى بولىنەدى.

سونىمەن قاتار 60 پاتەرلى ءۇيدىڭ قۇرىلىسى باستالادى. بۇل جۇمىستاردىڭ جەتكىلىكسىز ەكەنىن ايتقان وبلىس باسشىسى 60 پاتەرلى ءۇيدىڭ كەمىندە ەكەۋىنىڭ قۇرىلىسىن جوسپارلاۋدى تاپسىردى.

شونجى اۋىلىنىڭ تۇرعىندارى بىرنەشە ءۇيدىڭ جانىنان جوعارى ۆولتتى ەلەكتر جەلىلەرى تارتىلعانىنا الاڭدايدى. بۇل ادام دەنساۋلىعىنا زيانىن تيگىزۋى مۇمكىن دەيدى ولار.

قانات بوزىمبايەۆ كوميسسيا قۇرىپ، ءتيىستى تەكسەرۋ جۇرگىزۋدى، سونىڭ قورىتىندىسى بويىنشا تۇبەگەيلى شەشىم قابىلداۋدى مىندەتتەدى. وزگە دە ساۋالدار باحار اۋىلىنىڭ اۋماعىنداعى جاركەنت- شونجى رەسپۋبليكالىق تراسساسىندا جاياۋ جۇرگىنشى جولى مەن جول بەلگىسىن ورناتۋ، شونجى اۋىلىندا ەرەكشە قاجەتتىلىگى بار بالالار ءۇشىن وڭالتۋ ورتالىعىن اشۋ، ورتالىق اۋداندىق اۋرۋحانانى كۇردەلى جوندەۋ، اۋعاندىق ارداگەرلەردى جۇمىسپەن قامتۋعا جانە ۇيلەرىنە جەڭىلدىكپەن گاز قوستىرۋعا ىقپال ەتۋگە قاتىستى ايتىلدى.

جاڭالىقتار