قاسىم-جومارت توقايەۆ قىرعىزستان جانە وزبەكستان پرەزيدەنتتەرىمەن تەلەفون ارقىلى سويلەستى
6 ماۋسىم 19:05

قاسىم-جومارت توقايەۆ قىرعىزستان جانە وزبەكستان پرەزيدەنتتەرىمەن تەلەفون ارقىلى سويلەستى

نۇر-سۇلتان. قازاقپارات - قىرعىزستان پرەزيدەنتى سادىر جاپاروۆ قاسىم-جومارت توقايەۆتى جالپىحالىقتىق رەفەرەندۋمنىڭ ءساتتى وتۋىمەن قۇتتىقتاپ، دامۋدىڭ جاڭا كەزەڭىنە قادام باسقان قازاقستانعا جىلى لەبىزىن ءبىلدىردى، دەپ حابارلايدى اقوردا.

قاسىم-جومارت توقايەۆ سادىر جاپاروۆقا قۇتتىقتاعانى ءۇشىن جانە قىرعىزستان باقىلاۋشىلارىنىڭ رەفەرەندۋمعا بەلسەندى قاتىسقانىنا ريزاشىلىعىن ءبىلدىردى.

مەملەكەت باسشىسى جاڭا قازاقستاندى قۇرۋ ۇدەرىسىندە باۋىرلاس قىرعىزستانمەن اراداعى ىنتىماقتاستىقتى ودان ءارى نىعايتۋعا ەرەكشە كوڭىل بولىنەتىنىن ايتتى.

تاراپتار جاقىندا بىشكەكتە وتكەن كەلىسسوز ناتيجەسى قازاق-قىرعىز قارىم-قاتىناستارىنىڭ جوعارى دەڭگەيىن ناقتىلاعانىن جانە ەكى ەل اراسىنداعى ستراتەگيالىق سەرىكتەستىكتىڭ كوكجيەگىن كەڭەيتە تۇسكەنىن اتاپ ءوتتى.

قازىرگى ۋاقىتتا قازاقستان مەن قىرعىزستان ۇكىمەتتەرى ساياسي، ساۋدا-ەكونوميكالىق جانە مادەني-گۋمانيتارلىق سالالاردا قول جەتكىزىلگەن ۋاعدالاستىقتاردى جۇزەگە اسىرۋ جۇمىستارىن جۇرگىزىپ جاتىر.

وزبەك تاراپىنىڭ باستاماسىمەن وتكەن تەلەفون ارقىلى سويلەسۋ بارىسىندا وزبەكستان پرەزيدەنتى شاۆكات ميرزيەيەۆ قاسىم-جومارت توقايەۆتى قازاقستاندا جالپىحالىقتىق رەفەرەندۋمنىڭ ءساتتى وتۋىمەن قۇتتىقتادى.

قاسىم-جومارت توقايەۆ شاۆكات ميرزيەيەۆكە قۇتتىقتاعانى ءۇشىن ريزاشىلىعىن ءبىلدىرىپ، كونستيتۋتسيالىق رەفورمالار ەلىمىزدىڭ ساياسي جانە ەكونوميكالىق تىنىس-تىرشىلىگىن جاڭعىرتۋعا باعىتتالعانىن اتاپ ءوتتى.

قازاقستان پرەزيدەنتى وزبەكستاننان كەلگەن وكىلەتتى دەلەگاتسيانىڭ رەفەرەندۋم بارىسىن باقىلاۋعا قاتىسقانىن ايتتى.

ەكى مەملەكەتتىڭ باسشىلارى قازاقستان مەن وزبەكستان اراسىنداعى ستراتەگيالىق سەرىكتەستىكتىڭ جانە وداقتاستىقتىڭ دايەكتى تۇردە دامىپ كەلە جاتقانىنا كوڭىلدەرى تولاتىنىنا توقتالدى.

بۇعان بەلسەندى ساياسي ديالوگتىڭ جوعارى دەڭگەيى مەن ەكى ەل ۇكىمەتتەرىنىڭ ۇيلەسىمدى جۇمىسى ىقپال ەتەدى.

ەكىجاقتى تاۋار اينالىمىنىڭ كولەمى قارقىندى تۇردە ۇلعايىپ كەلەدى.

اتاپ ايتقاندا، ونىڭ كورسەتكىشى ءبىرىنشى توقساننىڭ قورىتىندىسى بويىنشا 30 پايىزعا ارتىپ، 1 ميلليارد دوللاردان اسقان.

جاڭالىقتار