التىن-ەمەل پاركىندە دولانا كوبەلەگى قاپتاپ كەتتى
10 ماۋسىم 22:30

التىن-ەمەل پاركىندە دولانا كوبەلەگى قاپتاپ كەتتى

الماتى. قازاقپارات - الماتى وبلىسىنداعى «التىن-ەمەل» ۇلتتىق پاركىندەگى تاۋ شاتقالدارىندا دولانا كوبەلەگى قاپتاپ كەتتى، دەپ حابارلايدى قازاقپارات ءتىلشىسى.

ونىڭ ۆيدەوسى «التىن - ەمەل» تابيعي پاركىنىڭ Instagram - داعى پاراقشاسىندا جاريالاندى.

«كوبەلەكتەر گۇلدەردىڭ شىرىندارىمەن جانە جەردەگى ىلعال تامشىلارىمەن قورەكتەنەدى»، - دەلىنگەن الەۋمەتتىك جەلىدەگى پاراقشادا.

ۇلتتىق پارك مالىمەتىنشە، دولانا كوبەلەگى - اقكوبەلەك تۇقىمداسىنا جاتاتىن زياندى جاندىك.

كوبىنەسە جەمىس اعاشتارىن زاقىمدايدى.

«جاقىندا كوبەلەكتەر جۇمىرتقا سالادى، ودان شىققان جۇلدىزقۇرتتار ۇلتتىق پاركتەگى الما، ورىك، دولانا، المۇرت، يتمۇرىن سياقتى وسىمدىكتەردىڭ جاپىراقتارىن جەيدى»، - دەلىنگەن حابارلامادا.

جاڭالىقتار