مينيسترلىكتى ءبولۋ ءبىرقاتار باعىتتىڭ دامۋىنا تىڭ سەرپىن بەرەدى - اسحات ايماعامبەتوۆ
12 ماۋسىم 09:09

مينيسترلىكتى ءبولۋ ءبىرقاتار باعىتتىڭ دامۋىنا تىڭ سەرپىن بەرەدى - اسحات ايماعامبەتوۆ

نۇر-سۇلتان. قازاقپارات - مەملەكەت باسشىسىنىڭ ەكى مينيسترلىك، ياعني وقۋ-اعارتۋ مينيسترلىگى مەن عىلىم جانە جوعارى ءبىلىم مينيسترلىگىن قۇرۋ تۋرالى شەشىمى جۇيەنى ودان ءارى دامىتۋ ءۇشىن وتە ماڭىزدى.

كەشەدەن باستاپ وقۋ-اعارتۋ ءمينيسترى بولعان اسحات ايماعامبەتوۆ الەۋمەتتىك جەلىدەگى پاراقشاسىندا وي ءبولىستى، دەپ حابارلايدى قازاقپارات.

«سونىمەن قاتار، بۇل شەشىم پرەزيدەنت قاسىم-جومارت كەمەل ۇلى توقايەۆتىڭ سالانى دامىتۋ بويىنشا العا قويعان ناقتى مىندەتتەرىن ءتيىمدى ورىنداۋعا مۇمكىندىك بەرەدى. مەكتەپكە دەيىنگى، ورتا، قوسىمشا، تەحنيكالىق جانە كاسىپتىك ءبىلىم بەرۋ سالاسىنداعى مىندەتتەر مەن سىن-تەگەۋرىندەر اۋقىمى ارتىپ كەلەدى»، - دەپ جازادى مينيستر.

جوعارى ءبىلىم مەن عىلىم سالاسىنا توقتالعان ۆەدومستۆو باسشىسى «قازىردىڭ وزىندە قول جەتكىزىلگەن ناتيجەلەر كادرلار دايارلاۋ جانە عىلىمي ءوندىرىستى دامىتۋ ءۇشىن جاڭا، زور ماقسات- مىندەتتەر قويۋعا سەپتىگىن تيگىزگەنىن» ايتادى.

«بۇل رەفورما وسى باعىتتاردىڭ دامۋىنا تىڭ سەرپىن بەرەدى. سونداي-اق، جوعارى كورسەتكىشتەر ەكى مينيسترلىكتىڭ تىعىز ىنتىماقتاستىعىنا بايلانىستى بولادى»، - دەدى ول.

اسحات ايماعامبەتوۆ ءۇش جىلدىڭ ىشىندە مينيسترلىك ۇجىمىنىڭ ءبىلىم سالاسىن دا، عىلىم سالاسىن دا جەتىلدىرۋ ماقساتىندا اتقارعان جۇمىسى از ەمەستىگىن جەتكىزدى. بارلىق زاڭ مەن وڭ وزگەرىس عالىمداردىڭ، پەداگوگتەردىڭ، باسقا دا قىزمەتكەرلەردىڭ مارتەبەسىن كوتەرۋگە ەرەكشە كوڭىل ءبولىپ وتىرعان پرەزيدەنتتىڭ جەكە قولداۋىنىڭ ارقاسىندا قابىلدانعانىنا توقتالدى.

«ءۇش جىل بويى ءبىلىم جانە عىلىم ءمينيسترى رەتىندە اتقارىلعان جۇمىستار تۋرالى ەسەپ بەرگەن ءجون دەپ سانايمىن. ناقتىراق ايتقاندا، سىبايلاس جەمقورلىق تاۋەكەلدەرىن جويۋ، اشىقتىق پەن ترانسپارەنتتىلىكتى قامتاماسىز ەتۋ، ءبىلىم ساپاسى مەن عىلىمنىڭ الەۋەتىن ارتتىرۋ باعىتىندا قانداي شەشىمدەر قابىلداندى، قانداي دەرەكتەر نەگىزىندە جۇرگىزىلدى جانە جالپى قانداي جۇمىستار اتقارىلعانى تۋرالى ەسەپ بەرگەن ماڭىزدى.

ءبىرىنشى كەزەكتە مەملەكەت باسشىسىنا سەنىم ءبىلدىرىپ، ءبىلىم جانە عىلىم ءمينيسترى كەزىمدە قولداۋ كورسەتكەنى ءۇشىن العىسىمدى بىلدىرگىم كەلەدى.

سونداي-اق، ءبىلىم جانە عىلىم سالاسىنىڭ قىزمەتكەرلەرىنە، مينيسترلىكتىڭ، ۆەدومستۆولىق باعىنىستاعى ۇيىمداردىڭ جانە عىلىمي ۇيىمداردىڭ قىزمەتكەرلەرىنە، ج و و- نىڭ پروفەسسورلىق- وقىتۋشىلىق قۇرامدارىنا، وبلىستاردىڭ دەپارتامەنتتەرىنە، ءبىلىم باسقارمالارىنا العىس ايتامىن.

ەلىمىزدىڭ پەداگوگتەرىنە قولداۋ كورسەتىپ، بىرلەسىپ اتقارعان جۇمىسى ءۇشىن العىسىم شەكسىز.

الدا جاڭا قازاقستاننىڭ دامۋى جولىندا جاڭا مىندەتتەر مەن ماقساتتار تۇر»، - دەپ تۇيىندەدى مينيستر.

ەسكە سالساق، اسحات ايماعامبەتوۆ قازاقستان رەسپۋبليكاسىنىڭ وقۋ-اعارتۋ ءمينيسترى بولىپ تاعايىندالدى.

جاڭالىقتار