ءابىلقايىر حان مەن بوپاي حانىمدى ۇلىقتاۋ شاراسى باستالدى
16 ماۋسىم 09:08

ءابىلقايىر حان مەن بوپاي حانىمدى ۇلىقتاۋ شاراسى باستالدى

اقتوبە. قازاقپارات - اقتوبەدە قوعام جانە مادەنيەت قايراتكەرلەرى جينالدى.

وڭىردە ءابىلقايىر حان مەن بوپاي حانىمدى ۇلىقتاۋ شاراسى باستالدى، دەپ حابارلايدى قازاقپارات ءتىلشىسى.

اقتوبە وبلىسىنىڭ اكىمى وڭداسىن ورازالين ءابىلقايىر حان مەن ونىڭ ايەلى بوپاي حانىمدى ​ەسكە الۋ شارالارىنا قاتىسۋعا كەلگەن مەملەكەت جانە قوعام قايراتكەرلەرى ءومىرزاق وزعانبايەۆ، جاۋعاشتى نابيەۆ، گەنەرال- مايور ايتقالي يسەنعۇلوۆ، ءدىن قايراتكەرى سەرىكباي وراز بەن مادەنيەت قايراتكەرى سەرگەي ءازىموۆتى قابىلدادى.

«اقتوبە جەرىندە جۇزدەسكەنىمە قۋانىشتىمىن. ەسكە الۋ شاراسىن وتكىزۋ تۋرالى باستاما كوتەرىلگەندە، قولداۋ كورسەتۋدى ءجون كوردىك. باسقاشا بولۋى مۇمكىن ەمەس ەدى. ءابىلقايىر حان - ءبىزدىڭ ۇلى بابامىز، ونىڭ قىزمەتى ارقاسىندا قازاق حالقى ءوزىنىڭ ۇلتتىق بولمىسىن، ادەت- عۇرپىن، تاريحى مەن مادەنيەتىن ساقتاي الدى»، - دەدى وبلىس اكىمى.

نەگىزگى ءىس- شارا ءابىلقايىر حان جەرلەنگەن «حان مولاسى» مەموريالدىق كەشەنىنىڭ اۋماعىندا وتەدى. وعان قاتىسۋ ءۇشىن اقتوبە وبلىسىنا نۇر- سۇلتان، الماتى قالالارى مەن ەلىمىزدىڭ كورشىلەس وڭىرلەرىنەن قوناقتار كەلدى. وبلىس اكىمىمەن كەزدەسۋدە ءابىلقايىر حاننىڭ ۇرپاعى، گەنەرال- مايور ايتقالي يسەنعۇلوۆ اقتوبەلىكتەردىڭ بابالار رۋحىنا ۇقىپتىلىقپەن قارايتىنىنا ريزاشىلىعىن ءبىلدىردى. «ءبىز اقتوبەلىكتەردىڭ ەلىمىزدىڭ وسى بولىگىندەگى قازاق تاريحىن جانداندىرۋدىڭ باستاماشىسى بولعانىن ماقتان تۇتامىز»، - دەدى ول.

مۇنداي ءىس-شارالاردىڭ ۇلتتىق سانا-سەزىمدى نىعايتۋدا ماڭىزى زور ەكەنى اتاپ ءوتىلدى. «جاستاردىڭ ۇلتتىق سانا-سەزىمىن وياتۋ، ولاردى كورنەكتى قازاق قايراتكەرلەرى تۋرالى بىلىممەن تولتىرۋ اسا ماڭىزدى. بۇل باعىتتا ءسىزدىڭ وڭىرىڭىزدە ەدىگە باتىر، ەسەت باتىر، دوسجان حازىرەت تۋرالى ەستەلىكتەردى جاڭعىرتۋ جانە ساقتاۋ بويىنشا ۇلكەن جۇمىستار جۇرگىزىلۋدە. بۇل جاس ۇرپاققا اۋاداي قاجەت»، - دەپ اتاپ ءوتتى تاريح عىلىمدارىنىڭ دوكتورى ، اكادەميك ءومىرزاق وزعانبايەۆ. سونداي-اق رەجيسسەر سەرگەي ءازىموۆ تە ءوز پىكىرىن ءبىلدىردى .

«ءابىلقايىر حان وتە قيىن ۋاقىتتا ءۇش ءجۇزدىڭ باسىن قوسا الدى. ءبىزدىڭ زامانىمىزدا بىرلىك سول كەزدەگىدەي ماڭىزدى، ءبىراق ۇلتتىق بىرەگەيلىكسىز بىرلىك بولمايدى. سوندىقتان تاريحىمىزدى، ونى جاساعاندار تۋرالى ەستە ساقتاۋ وتە ماڭىزدى. ەسكە الۋ شارالارى ءابىلقايىر حاننىڭ ادال سەرىگى - بوپاي حانىمعا دا ارنالىپ وتىرعانى ادىلەتتى. حان ولگەن سوڭ، ونىڭ ءولىمىنىڭ ءوشىن الىپ، ءىسىن جالعاستىرىپ، ۇلدارىن تاققا وتىرعىزدى. ول ۇلى قايراتكەر، دانا ديپلومات بولدى»، - دە ءدى ول .

اۆتور: التىناي ساعىندىقوۆا


جاڭالىقتار