بەيجىڭ وركەسترىندە قازاق دومبىراسىنىڭ ءۇنى بار
21 ماۋسىم 15:44

بەيجىڭ وركەسترىندە قازاق دومبىراسىنىڭ ءۇنى بار

نۇر-سۇلتان. قازاقپارات - بەيجىڭدە كۇمبىرلەگەن دومبىرا. قىتايداعى ۇلتتىق اسپاپتار وركەسترى ءبىراز جىلدان بەرى قازاقتىڭ ۇلتتىق اسپابىن وزدەرىنىڭ شىعارماشىلىق كەشتەرىندە پايدالانادى.

بىرلەسىپ وتكىزىلەتىن مادەني شارالاردا دا دومبىرا ءۇنىن ءجيى ەستيسىز. مۋزىكادا ءتىل جوق. ءبىراق حالىقتار تۇسىنىگىن ارتتىرۋدا ءمانى زور دەپ ەسەپتەيتىن ونەرپازدار شەت ەلدىك ارىپتەستەرىمەن بىرلەسىپ جوبالار جاساۋعا دايىن. ءبىراق وعان پاندەميا كەدەرگى كەلتىرىپ تۇر. قىتايدىڭ ورتالىق تەاترىندا قازاق دومبىراسىنىڭ ءۇنى كۇمبىرلەدى. شىعارماشىلىق ونەر ورتالىعى بەيجىڭ قالاسىنىڭ قاق ورتاسى تيانانمىن الاڭىنىڭ قاسىندا ورنالاسقان.

لي چانتسزيۋن، بەيجىڭ ۇلتتىق اسپاپتار وركەسترىنىڭ جەتەكشىسى:

- ءبىزدىڭ ۇلتتىق اسپاپتار وركەسترى قازاق جانە وزگە ەلدەردىڭ مۋزىكاسىن ورىندايدى. مەنىڭ ويىمشا، مۋزىكا مەن مادەنيەت بۇكىل الەمدى بىرىكتىرەتىن دۇنيە. ويتكەنى مۋزىكا ارالاسۋدىڭ ەڭ وڭاي جولى. مۇندا ءتىل سەكىلدى ەشقانداي كەدەرگى جوق، ءبىر- بىرىمىزگە نوتا جىبەرىپ، بىرگە مۋزىكا ويناۋىمىزعا بولادى.

بەيجىڭ ۇلتتىق اسپاپتار وركەسترىندە دومبىرا ءۇنىنىڭ قوسىلعانىنا ءبىراز جىل ءوتتى. بيىل جىل سوڭىنا تاعى ءبىر ۇلكەن كونسەرت جوسپارلانعان. البەتە وندا دا قازاقتىڭ ۇلتتىق اسپابى شەرتىلەدى. شىعارماشىلىق بىرلەستىك جەتەكشىسىنىڭ ايتۋىنشا، شەتەلدىك ونەر ۇجىمدارىمەن تىعىز قارىم- قاتىناستا جۇمىس ىستەۋ باستى نازاردا. ءبىراق وتكەن جىلدارى پاندەميا كەدەرگى كەلتىردى.

لي چانتسزيۋن، بەيجىڭ ۇلتتىق اسپاپتار وركەسترىنىڭ جەتەكشىسى:

- قازاقستاندىق مۋزىكانتتارمەن بىرلەسىپ جۇمىس ىستەۋگە مۇمكىندىگىمىز بولادى دەگەن ءۇمىتىم بار. ءوزىمىزدىڭ دومبىراشىمىز بار، ءبىراق ءوزارا ارەكەتتەسىپ، ءبىر- بىرىمىزدەن ۇيرەنسەك دەپ ەدىك. مىسالعا، ءبىر جاعىنان ءبىزدىڭ دومبىراشى، ەكىنشى جاعىنان، قازاق ونەرپازى مۋزىكا ورىندايتىن كونسەرت ۇيىمداستىرۋعا بولار ەدى.

وركەستر ۇنەمى مۋزىكالىق تاجىريبەلەر وتكىزەدى، زاماناۋي تۋىندىلاردى قىتاي جانە وزگە ۇلتتىق اسپاپتارعا بەيىمدەيدى. جىلىنا 300 گە جۋىق كونسەرت وتكىزەدى. الايدا كوروناۆيرۋستىڭ ءورشۋى ونەر سالاسىنا دا كەرى اسەرىن تيگىزدى. قازىر ونەرپازدار رەپەتيتسيا جاساي المايدى.


www.24.kz

جاڭالىقتار