ساياباقتا ءان ايتىپ ءبىر-اق كۇندە تانىمال بولعان قىرعىز كەلىنشەك قازاقستانعا كەلمەك
24 ماۋسىم 10:08

ساياباقتا ءان ايتىپ ءبىر-اق كۇندە تانىمال بولعان قىرعىز كەلىنشەك قازاقستانعا كەلمەك

نۇر-سۇلتان. قازاقپارات – 24.kg ايگىلى كانادالىق ءانشى سەلين ديوننىڭ ءانىن ايتىپ، ءبىر-اق كۇندە تانىمال بولعان قىرعىز كەلىنشەك قازاقستاندا ۇيىمداستىرىلاتىن حالىقارالىق ءان بايقاۋىنا قاتىسپاق.

ول قىرعىزستان مادەنيەت مينيسترلىگىنىڭ قولداۋىنا يە بولدى، دەپ جازادى KAZ. NUR. KZ ءتىلشىسى 24.kg پورتالىنا سىلتەمە جاساپ.

باسىلىمنىڭ جازۋىنشا، جەلىدە «قىرعىزستاندىق سەلين ديون» اتانعان بەگىماي تۇرىسبەكوۆا Сentral Asia’s Got Talent حالىقارالىق بايقاۋىنا قاتىسپاقشى، سونداي-اق ول قىرعىزستاننىڭ قازاقستانداعى، تۇركياداعى، ۆەنگرياداعى مادەني كۇندەرى اياسىندا ونەر كورسەتەدى.

بەگىماي تۇرىسبەكوۆا بۇعان دەيىن ب ا ق-قا بەرگەن سۇحباتىندا مۋزىكالىق ۋچيليشەنى بىتىرگەنىن كەيىن قىرعىز مەملەكەتتىك مادەنيەت جانە ونەر ۋنيۆەرسيتەتىنە وقۋعا تۇسكەنىن، الايدا اياقتاي الماي قالعانىن ايتقان ەدى.

مينيسترمەن كەزدەسۋدە ۆەدومستۆوداعىلار وعان ج و و-دا وقۋىن قايتا جالعاستىرۋىنا كومەكتەسەتىنىن مالىمدەگەن.

ەسكە سالا كەتسەك، بۇعان دەيىن قىرعىز اۋىلىندا تۇراتىن قاراپايىم كەلىنشەكتىڭ الەۋمەتتىك جەلى ارقىلى تانىمال بولعانىن جازعان ەدىك.

جاڭالىقتار