ءماجىلىس ءتوراعاسى زاڭ جوبالارىنا قاتىستى مينيسترلەردى سىنادى
30 ماۋسىم 13:03

ءماجىلىس ءتوراعاسى زاڭ جوبالارىنا قاتىستى مينيسترلەردى سىنادى

نۇر- سۇلتان. قازاقپارات - بۇگىن پارلامەنت پالاتالارىنىڭ بىرلەسكەن وتىرىسىندا ءماجىلىس ءتوراعاسى ەرلان قوشانوۆ زاڭ شىعارۋ پروتسەسىندەگى كەمشىلىكتەردى اتادى، دەپ حابارلايدى قازاقپارات ءتىلشىسى.

«پارلامەنت پەن ۇكىمەتتىڭ بىرلەسىپ ءتيىمدى جۇمىس ىستەگەنىن ايتا وتىرىپ، زاڭ شىعارۋ پروتسەسىنە تەرىس اسەر ەتەتىن جەكەلەگەن كەمشىلىكتەردى دە اتاپ وتكەن ءجون. جۇيەلى كەمشىلىكتەردىڭ ءبىرى - دۇرىس جوسپارلاماۋ، زاڭ جوبالارىنىڭ جەتكىلىكتى پىسىقتالماۋى جانە دايىن بولماۋى. ۇكىمەتتىڭ كوبىنەسە مەرزىم جاقىنداعان كەزدە بەلسەندىلىگى ارتا باستايدى. مۇنى، ادەتتە، جىلدىڭ نەمەسە سەسسيانىڭ سوڭىندا بايقاۋعا بولادى»، - دەدى ە. قوشانوۆ.

ونىڭ ايتۋىنشا، پارلامەنت قابىرعاسىندا زاڭ جوبالارىنىڭ كوپتەگەن نورمالارىن قايتا وڭدەپ شىعۋ، جەكەلەگەن نورمالار بويىنشا ۇكىمەت مۇشەلەرىنىڭ ناقتى ۇستانىمىنىڭ بولماۋ ءۇردىسى قالىپتاستى. «مىسالى، دەنساۋلىق تۋرالى كودەكستىڭ ءبىر نورماسى تەك ءبىرىنشى جارتىجىلدىق ىشىندە قاراما- قارسى پوزيتسيادا ەكى رەت تۇبەگەيلى وزگەردى. قاڭتار ايىندا ەلىمىزدە تىركەلگەن دارىلىك زاتتار مەن مەديتسينالىق بۇيىمداردى شەكتى باعاسىز ساتىپ الۋعا جانە بىرلەسىپ تولەۋگە جول بەرىلمەيدى دەگەن نورما قابىلداندى. الايدا ماۋسىم ايىندا بۇل نورما قايتا الىپ تاستالدى. ەكى جاعدايدا دا وزگەرىستىڭ قاجەتتىلىگى حالىقتىڭ ءدارى- دارمەكسىز قالۋى مۇمكىن دەگەن ۋاجبەن ءتۇسىندىرىلدى. مۇنداي فاكتىلەر ءبىرلى- جارىم ەمەس»، - دەدى ءماجىلىس ءتوراعاسى.

ونىڭ سوزىنە قاراعاندا، قارالىپ جاتقان زاڭ جوبالارىنا وزگەرىستەر تولاسسىز ەنگىزىلەدى، ولاردىڭ ىشىندە جوبانىڭ تۇجىرىمداماسىنا ساي كەلمەيتىن تۇزەتۋلەر دە بار.

«سونىڭ سالدارىنان زاڭ جوباسىنىڭ باستاپقى كونسەپتسياسى ايتارلىقتاي وزگەرەدى. مينيسترلەر دەپۋتاتتار ارقىلى وزدەرىنىڭ «جانىپ تۇرعان» ماسەلەلەرىن شەشىپ قالعىسى كەلەتىن جاعدايلار دا بار. بۇل ماجىلىستە دە، سەناتتا دا قارالۋ ساتىسىندا كەزدەسەدى. وسىنىڭ سالدارىنان ءماجىلىس ماقۇلداعان زاڭ جوباسىن سەنات تۇزەتۋلەرمەن قايتارۋعا ءماجبۇر بولادى. كوپ جاعدايدا بۇل جاڭا تۇزەتۋلەر - ماجىلىستە ۇسىنىلماعان جانە تالقىلانباعان نورمالار بولىپ كەلەدى. زاڭ جوبالارىن ساپاسىز دايىنداۋ جانە ساراپتامالاردى ۋاقتىلى جۇرگىزبەۋ مەملەكەت باسشىسى العا قويعان مىندەتتەردى ىسكە اسىرۋعا كەدەرگى كەلتىرۋى مۇمكىن»، - دەدى ول.

«دەپۋتاتتاردىڭ تۇزەتۋلەرىنە قورىتىندىلاردىڭ ۋاقتىلى بەرىلمەۋى دە ەرەكشە نازار اۋدارۋدى قاجەت ەتەدى. مىسالى، بالا قۇقىقتارىن قورعاۋ جونىندەگى زاڭ جوباسى بويىنشا ۇكىمەتتىڭ جاۋابى 5 ايدان كەيىن كەلدى. سونىڭ سالدارىنان، بۇل زاڭ ماجىلىسكە ەنگىزىلگەننەن كەيىن ەكى جىل وتكەن سوڭ عانا قابىلداندى. زاڭ جوبالارىن پارلامەنتتىڭ قوس پالاتاسىندا تانىستىرۋ كەزىندە جەكەلەگەن مينيسترلىكتەر مەن ۆەدومستۆولار بايانداماشىلارىنىڭ دايىندىعى جەتكىلىكسىز بولاتىن جاعدايلار دا كەزدەسەدى. زاڭ جوبالارى مەن ساراپتامالاردىڭ ساپاسىن باعالاۋ الداعى ۋاقىتتا دا پارلامەنتتىڭ ەرەكشە باقىلاۋىندا بولادى»، - دەدى ءماجىلىس ءتوراعاسى.

اۆتور: رۋسلان عابباسوۆ

جاڭالىقتار