قازاقستان رەسەيلىكتەر اراسىندا تانىمال ءۇش باعىتتىڭ قاتارىنا ەندى
1 شىلدە 12:25

قازاقستان رەسەيلىكتەر اراسىندا تانىمال ءۇش باعىتتىڭ قاتارىنا ەندى

نۇر-سۇلتان. قازاقپارات - قازاقستان 2022 -جىلدىڭ ءساۋىر- ماۋسىمىندا رەسەيلىك تۋريستەر اراسىندا تانىمال ەلدەر رەيتينگىندە ءۇشىنشى ورىنعا يە بولدى.

رەسەيلىك ۇيالى بايلانىس وپەراتورىنىڭ ساراپشىلارى روۋمينگتى پايدالانۋ ستاتيستيكاسىن تالداي وتىرىپ، وسىنداي قورىتىندىعا كەلدى، - دەپ حابارلايدى Kaz.tengritravel.kz ءتىلشىسى.

بەلارۋس رەسەيلىكتەر اراسىندا ەڭ تانىمال باعىتتاردىڭ ءبىرى. ەكىنشى ورىندى تۇركيا يەلەندى. 2022 -جىلى بەلارۋستەگى رەسەيلىك ساياحاتشىلاردىڭ سانى پاندەمياعا دەيىنگى كەزەڭمەن سالىستىرىلدى. بۇل كورسەتكىش تۇركيادا ەكى ەسە ازايدى، ال قازاقستاندا 52 پايىزعا ءوستى.

وپەراتوردىڭ مالىمەتىنشە، كورشى مەملەكەتتەگى تۋريستىك اعىمنىڭ ءوسۋى بويىنشا كوشباسشىلار قاتارىندا قىرعىزستان (2019 -جىلمەن سالىستىرعاندا ءوسىم 71 پايىز) جانە تىكەلەي اۋەقاتىناسى بار وزبەكستان (+55 پايىز) بار.

سونداي-اق، ابونەنتتەر موبيلدى ينتەرنەتتى الدەقايدا بەلسەندى قولدانا باستاعانى اتاپ ءوتىلدى. روۋمينگتەگى ترافيكتىڭ ەڭ كوپ شىعىنى YouTube-تە (8 پايىز). ودان كەيىن WhatsApp (6 پايىز)، Telegram (5 پايىز) جانە VK (4 پايىز)، ياندەكس. مۋزىكا جانە تيكتوك - ءارقايسىسى 2 پايىز. ال رەسەيلىكتەر اراسىندا شەتەلدە مارشرۋتتار ىزدەۋدىڭ ەڭ تانىمال قوسىمشاسى ياندەكس. كارتالار بولدى. ولار كارتوگرافيالىق سەرۆيستەردەگى بارلىق ترافيكتىڭ 60 پايىزىن قۇرايدى. موبيلدى ينتەرنەتتى بەلسەندى قولداناتىن ەلدەردىڭ قاتارىندا گرەكيا (ساپارعا ءبىر ادامعا 2,7 گيگابايت)، ازەربايجان (2,5 گيگابايت) جانە ب ا ءا (2 گيگابايت) بار.

جاڭالىقتار