Imanbek تۋىندىسى 1 ميلليارد مارتە تىڭدالعانى ءۇشىن Spotify سىيلىعىن جەڭىپ الدى

نۇر- سۇلتان. قازاقپارات - قازاقستاندىق ديدجەي Imanbek Spotify سەرۆيسىنىڭ ارنايى سىيلىعىنا يە بولدى، دەپ حابارلايدى قازاقپارات.

رەسۋرستىڭ باسپا ءسوز قىزمەتى تاراتقان مالىمەتكە سەنسەك، Imanbek – ت م د بويىنشا ترەگى 1 ميللياردتان اسا مارتە تىڭدالعان تۇڭعىش مۋزىكانت. ول بۇل مەجەگە وتكەن جىلدىڭ قازان ايىندا جەتكەن. ونىڭ Roses-Imanbek Remix اتتى اۋەنىن تىڭداعاندار سانى بۇگىندە الەم بويىنشا 1,5 ميللياردتان اسىپ كەتتى. مۋزىكا سەرۆيسى ديدجەيدى قۇتتىقتاپ، سىيلىقتى تابىستادى.

«ءارتيستى وسىنداي ءىرى جەتىستىكپەن جانە كلۋبقا قوسىلۋىمەن قۇتتىقتايمىز. I is for Imanbek!» دەلىنگەن حابارلامادا. وسىلايشا Imanbek Billions Club-قا قوسىلدى. ونىڭ پلەيليست بويىنشا «كورشىلەرى» - بيللي ايليش، ترەۆيس سكوتت، ادەل جانە باسقا الەمدىك اتاقتى مۋزىكانتتار.

مۇنىڭ الدىندا Spotify-دىڭ ءدال وسى ماراپاتى كانادالىق رەپەر درەيك، نورۆەگ ديدجەيى Kygo جانە بريتان ءانشىسى دۋا ليپاعا تاپسىرىلعان ەدى. ايتا كەتەيىك، اتالعان رەميكسىمەن الەمدىك مۋزىكا چارتتارىندا قارا ءۇزىپ العا شىققان يمانبەك زەيكەنوۆ ءان ارلەۋدى جەرگىلىكتى ديدجەيلەر مەن پروديۋسەرلەردەن جانە Youtube جەلىسىندەگى ۆيدەوساباقتان ۇيرەنگەن.

2019 -جىلدىڭ جازىندا يمانبەك Saint Jhn اتتى رەپەردىڭ Roses اتتى ءانىن تاۋىپ، سوعان رەميكس جازۋدى قولعا الادى. بۇل كومپوزيتسيا ءۇش جىل بۇرىن شىعىپ قويعان بولاتىن. يمانبەك انگە رەميكس جازىپ، ونى الەۋمەتتىك جەلىگە جاريالادى. ارادا بىرنەشە اي وتكەندە ول پوپ جۇلدىزعا اينالدى. وتكەن جىلى قازاقستاندىق مۋزىكانتتىڭ Roses انىنە جازىلعان رەميكسى Grammy سىيلىعىن جەڭىپ الدى.