Ақтөбе облысында мал басы артып, ауыл шаруашылығы техникалары жаңартылуда
2022 жылғы 13 маусым 19:22

Ақтөбе облысында мал басы артып, ауыл шаруашылығы техникалары жаңартылуда

НҰР-СҰЛТАН. ҚазАқпарат – Ақтөбе облысында мал басы артып, ауыл шаруашылығы техникалары жаңартылып жатыр. Бұл туралы Ақтөбе облысының әкімі Оңдасын Оразалин айтып берді, деп хабарлайды ҚазАқпарат тілшісі.

«Өңіріміздің өзіндік әлеуеті – қолайлы климат және кең байтақ алқаптардың болуы мал шаруашылығы мен егін шаруашылығын дамытуға және еліміздің батыс өңірінің азық-түлік қауіпсіздігін қамтамасыз етуге, өнімдерді шетелдерге экспорттауға мүмкіндік береді. Біз 2019 жылы Ауыл шаруашылығы министрлігімен келісіп, Ақтөбе облысының агроөнеркәсіптік кешенінің дамуы бойынша 5 жылдық жоспар әзірледік», - деп атап өтті О. Оразалин Орталық коммуникациялар қызметінде өткен баспасөз мәслихатында.

Сол жоспарға сәйкес 2020-2021 жылдары жем-шөпті субсидиялау үшін жергілікті бюджеттен бұрын-соңды болмаған 12,7 млрд теңге бөлінді және ауыл шаруашылығы техникасын жаңартуды субсидиялауға 7,2 млрд теңге қаражат қарастырылған.

«Техника алуға республикалық бюджеттен беретін 25%-тік субсидияға қосымша жергілікті бюджеттен 10% қосымша бөліп отырмыз. Нәтижесінде, ауыл шаруашылығы техникасының жаңартылуы қарқынды жүруде. Мәселен, 2019 жылдың қорытындысы бойынша бұл көрсеткіш 3,9% құраса, 2021 жылы 5,9%-ке жеткізілді. 2021 жылдың қорытындысына сәйкес аталған бағыт бойынша облыстар арасында алдыңғы қатардамыз, яғни, техникалардың жаңартылуына қолдау көрсетілді», - деді О. Оразалин.

Соңдай-ақ соңғы 2 жылда 700 млрд теңгеден астам ауыл шаруашылығы өнімі өндірілді, жылқы малы 38%–ке өсті, ірі қара мал басы – 20%-ке, ұсақ мал – 7,1%-ке, құстар саны – 4,5%-ке ұлғайды. Осындай қарқынмен мал басының артуына байланысты жем-шөппен қамтамасыз ету үшін 2020 жылдан бері республикалық бюджет есебінен 25 мың гектар көлтабанды және 10,6 мың гектар үнемі суармалы жерлер бүгінде қалпына келтірілуде. Жалпы жоспарға сәйкес алдағы 3 жылда қолданыстағы суармалы жерлердің алқабын 100 мың гектарға дейін жеткіземіз», - деді өңір әкімі.

Осы шаралар арқылы облыс 32 негізгі азық-түліктің 24-імен өзін-өзі қамтамасыз етеді. Оның ішінде ұн, нан өнімдері, сүт, ет өнімдері, жұмыртқа және көкөніс түрлері бар.

«Алдағы 3 жылда агроөнеркәсіптік кешенде 315 млрд теңгеге 75 жобаны іске асыруды жоспарлап отырмыз. Нәтижесінде келешекте бағаны тұрақтандыруға толықтай мүмкіндігіміз болады», - деді Оңдасын Оразалин.


Ұқсас жаңалықтар
Серіктестер жаңалықтары

Jańalyqtar

Үрдіс

MURAǴAT