Атырау облысының ауылдарын газдандыруға 1 млрд теңге бөлінген
2022 жылғы 13 тамыз 21:41

Атырау облысының ауылдарын газдандыруға 1 млрд теңге бөлінген

АТЫРАУ. ҚазАқпарат – Биыл Атырау облысының ауылдарын газдандыруға 1 млрд теңге бөлінген, деп хабарлайды ҚазАқпарат.

Энергетика министрі Болат Ақшолақовтың мәліметіне сүйенсек, Атырау облысында газдандыру деңгейі 98,7% құрап отыр. Қазір өңірдің 660 мың тұрғыны табиғи газбен қамтамасыз етілген.

«Ұлттық экономика министрлігі бекітетін Атырау облысындағы табиғи газдың түпкілікті бағасы 1 текше метр үшін 5,3 теңгені, ал, атаулы әлеуметтік көмек алушыларға 1 текше метр газ бағасы 4,2 теңгені құрайды. Бұл – еліміздегі ең төмен баға», -деді Болат Ақшолақов.

Министрдің дерегіне қарағанда, биыл бекітілген республикалық бюджетте 3 жаңа жобаны іске асыруға 1 млрд теңге көзделген.

«Бұл – Исатай ауданындағы Қызыл үй, Жасқайрат ауылдарын газбен жабдықтау, сондай-ақ, Қызылқоға ауданының Тасқұдық, Соркөл, Сарықұмақ, Былқылдақты, Қоңыраулы, Кенбай елді мекендеріне газ құбыры желілерін салу жобалары. Аталған жобаларды іске асыру инфрақұрылымды жүргізуге, шамамен 1 300 адамды газбен қамтамасыз етуге мүмкіндік береді», -деп мәлім етті Энергетика министрі.

Сондай-ақ, Мемлекет басшысының тапсырмасына сәйкес, «Мақат-Солтүстік Кавказ» магистралды газ құбыры лупингінің құрылысы» инвестициялық жобасы іске асырылып жатыр. Бұл мұнайлы өңірдің өркендеу қажеттілігін ескере отырып, табиғи газдың қосымша көлемін тасымалдауға жол ашады.

Еске сала кетелік, бұған дейін Атырау облысында сұйытылған газдың 1 литрі 50 теңгеден сатылатынын жазған едік.


Ұқсас жаңалықтар
Серіктестер жаңалықтары

Jańalyqtar

Үрдіс

MURAǴAT