Мыңнан астам жас сарбаз әскери ант қабылдады
2022 жылғы 19 маусым 16:25

Мыңнан астам жас сарбаз әскери ант қабылдады

НҰР-СҰЛТАН. ҚазАқпарат – Қарулы күштердегі әскери бөлімдерде жас сарбаздар Отан алдында адал қызмет етуге ант берді, деп хабарлайды ҚазАқпарат Қорғаныс министрлігінің баспасөз қызметіне сілтеме жасап.

Әуе шабуылына қарсы қорғаныс әскерлерінде ант беру рәсімі олардың құрылғанына 30 жыл толуымен тұспа-тұс келді. Жалпы, әскери дайындық курсынан және ант қабылдағаннан кейін жас буын елдің әуе шептерін қорғауға қажетті әскери-есептік мамандықтарды игеруге кіріседі.

Сондай-ақ, Ұлттық қорғаныс университетінің бірегей бөлімшелерінің бірі болып саналатын әскери-ғылыми взводының мерзімді қызметтегі әскери қызметшілері де Отанға адал болуға ант берді. Олардың негізгі міндеті – инженерлік-техникалық бейіндегі, ІТ технологиялар мен киберқауіпсіздік бағыттары бойынша ғылыми жұмыс атқару.

Әскери-ғылыми взводтың әскери қызметшілері өздерінің күнделікті қызметінде жауынгерлік даярлықтың негізгі пәндерін игеруден басқа Қарулы күштердің игілігі үшін ғылыми-зерттеу, тәжірибелік-конструкторлық және сынақ жұмыстарын орындауға тартылады.

«Еліміздің жетекші әскери жоғары оқу орны – Ұлттық қорғаныс университетіне қызмет етуге келгенімді мақтан тұтамын және Отан алдындағы конституциялық парызымды лайықты орындау үшін бар күш-жігерімді саламын. Бұл үшін менің әскерге барар алдында алған ғылыми-техникалық бағыттағы тәжірибем мен білімім бар», – дейді қатардағы жауынгер Артем Егоров.

Салтанатты іс-шараларға Қарулы күштердің ардагерлері, интернационалист-жауынгерлер, сарбаздардың туған-туыстары қатысты.

Ант қабылдағаннан кейін дәстүр бойынша бөлімше командирлері ата-аналармен әңгімелесті. Қызықтырған сұрақтарына жауап беріп, оларды әскери бөлімдердің инфрақұрылымымен таныстырды, казармалар, асханалар мен оқу сыныптарын көрсетті.


Ұқсас жаңалықтар

Jańalyqtar

Үрдіс

MURAǴAT