+7 (701) 759 90 19
USD 425.95 EUR 495.12
RUB 6 CNY 66.6
Jańalyqtar

Dáýlesker kúıshi Kamal Maqaıuly ómirden ozdy - Sheteldegi qazaqsha BAQ-qa sholý

2021 jylǵy 19 qyrkúıek 13:03
Bólisińiz:
Dáýlesker kúıshi Kamal Maqaıuly ómirden ozdy - Sheteldegi qazaqsha BAQ-qa sholý

NUR-SULTAN. QazAqparat- «QazAqparat» HAA sheteldegi qazaq tilinde taraıtyn aqparat kózderine aptalyq sholýyn usynady.

Dáýlesker kúıshi Kamal Maqaıuly ómirden ozdy - CNR

Qytaı elinde turatyn qandasymyz, dáýlesker kúıshi, Qytaı mýzykanttar qoǵamynyń múshesi Kamal Maqaıuly ómirden ozdy, dep jazady qytaılyq kazakcnr.com saıty.

Atalǵan BAQ-tyń jazýynsha, Shyńjań qazaqtarynyń qazynaly kúı ónerin nasıhattap júrgen, Kóneniń kózi, eki ǵasyrdyń kýágeri bolǵan, asa qadirli abyz qart, dáýlesker kúıshi, Áshimtanýshy Kamal Maqaıuly 98 jasynda ómirden ozǵan.

Kamal Maqaıuly 1924 jyly QHR-dyń Іle aımaǵy Toǵyztaraý aýdanynda týǵan.

«Daryndy kúıshi, sańlaq sazger Kamal Maqaıuly - XX ǵasyrdyń 40- jyldarynan bastap óner alamanyna at basyn buryp, týǵan eli, ósken ortasyn kúımen kúmbirletip, ánmen áldılep, halyqtyń qoshametine, alqaýyna bólengen. Kamal ultymyzdyń kóne kúı muralaryn jınap, búgingi urpaqqa amanattap jetkizgen, halyq murasynyń muńyn erte tanyǵan tuǵyry bólek tulǵa. Óner jolyndaǵy eńbegi áýeli ustazy Áshim Dúńsheulynyń artyna qaldyrǵan mol muralaryn halyqqa qaz-qalpynda jetkizý jolynda eńbektengen. Kamal Maqaıuly Áshim kúılerinen «Kúı kúmbiri», «Altyn barmaq», «Áshim kúılerinen tańdamalylar» atty kitaptardy baspadan shyǵardy. Sondaı-aq, kóneniń kózindeı, tarıhtyń ózindeı bolǵan salıqaly dombyrashy telearnalar men radıonyń altyn qoryna 200-den astam halyq kúıi men kúı ańyzdaryn usynyp, ónerdiń úzilmeıtin sara jolyn saldy», - dep jazady CNR saıty.


Kamal Maqaıulynyń eńbegi Qytaı qazaqtarynyń arasynda ǵana tanylyp qoımaı, Qazaqstannyń «Mádenı mura» memlekettik baǵdarlamasy sheńberinde jaryq kórgen «Qazaqtyń dástúrli 1000 kúıi» atty dombyra kúıleri antologııasyna da engen. Onda Kamaldyń oryndaýyndaǵy Áshiminiń «Almaly», «Keńes» sekildi 20-ǵa jýyq kúıi, al Kamal Maqaıulynyń óz týyndylarynan «Jaılaý dýmany» sııaqty on shaqty kúıi enip, esimi tarıh paraǵyna jazylǵan.

Abyz kúıshi qazirge deıin «Meniń dombyram», «Kórkem Tıan-Shan», «Jasyl alqap», «Jaılaý dýmany» sekildi 30-dan astam kúı shyǵarǵan. K.Maqaıuly - Qytaı mýzykanttar qoǵamynyń múshesi, Shyńjań mýzykanttar qoǵamy tóraǵasynyń orynbasary, ShUAR ádebıet-kórkemóner qoǵamynyń múshesi, qytaı halyq ánderin baspadan shyǵarý redaktsııasynyń alqa múshesi bolǵan.

Osy jyly mamyr aıynda kúıshiniń ónegeli ómiri men irgeli izdensterinen syr shertetin «Káýsár» atty tańdamaly shyǵarmalar jınaǵy Shyńjan halyq baspasynan jaryqqa shyqqan.

«Kúı teńizi máńgi sarqylmaq emes, óner ólmeıdi, búkil ómiri án-kúıge aınalǵan kúı atamyzdyń ekinshi ǵumyry endi bastalady, ol- Óner ǵumyry! Kúı-kerýeni alysqa tartsyn! Biz abyz kúıshi Kamal Maqaıulynyń otbasyndaǵylarǵa, týys-týǵandaryna, barmaǵyn súıgen barsha ónersúıer qaýymǵa shyn júrekten kóńil aıtamyz. Qazanyń arty qaıyrly bolsyn! barlyq týys-týǵandaryna sabyr tileımiz!», - dep jazady CNR.

TúrikPA jıyny Túrkistanda ótedi - TRT

Túrkitildes Memleketter parlamenttik assambleıasy TúrikPA-nyń 10-shy plenarlyq jınalysy 27-28 qyrkúıekte Túrkistanda ótedi, dep habarlaıdy Túrkııa Radıo Televızııa portaly.

«Qazaqstan Parlamenti Májilisiniń Tóraǵasy Nurlan Nyǵmatýllın TúrikPA (Túrkitildes memleketterdiń Parlamenttik assambleıasy) bas hatshysy Altynbek Mamaıýsýpovty qabyldady. Kezdesýde 27-28 qyrkúıekte Qazaqstannyń Túrkistan qalasynda ótetin jınalystyń daıyndyqtary talqylandy. Ázerbaıjan, Qazaqstan, Qyrǵyzstan jáne Túrkııanyń májilis basshylary qatysatyn jınalysqa Ózbekstan da shaqyryldy. Jınalysta TúrikPa-nyń on jyldyq isterine baǵa beriledi jáne assambleıa sheńberinde yntymaqtastyqty jetildirý úshin jańa maqsattar aıqyndalady. Qazaqstannyń tuńǵysh prezıdenti Nursultan Nazarbaevtyń bastamasymen quryǵan TúrikPA-da Ázerbaıjan, Qazaqstan, Qyrǵyzstan jáne Túrkııa tolyq múshe, Vengrııa baqylaýshy mártebesine ıe», - dep jazady TRT.

«Aıdynlar» fılmi halyqaralyq kınofestıvalde Gran prı ıegeri atanjeńip aldy - ÓzA

Ózbekstan Ulttyq teleradıokompanııasynyń «Ózbektelefılm» memlekettik mekemesinde túsirilgen «Aıdynlar» fılmi Bolgarııanyń kıno, televıdenıe jáne ınternet baılanysy akademııasy uıymdastyrǵan IX Halyqaralyq kıno jáne televızııalyq festıvalinde Gran-prıdi jeńip aldy, dep jazady Ózbekstannyń ÓzA memlekettik aqparat agenttigi.

Korkem týyndy «Úzdik rejısser», «Úzdik operatorlyq jumys», «fılm úshin úzdik mýzyka», sondaı -aq «Ustaz» teleserııalyna jazylǵan «Úzdik stsenarıı» nomınatsııasy boıynsha jeńimpaz atandy.

Kartınada Qaraqalpaqstannyń jańarǵan beınesi men Aral teńiziniń probalemasy baıandalǵan.

Hıva - Túrik áleminiń mádenı astanasy - TRT

Túrik mádenıetiniń halyqaralyq uıymy Túriksoı tarapynan jarııalanǵan «Hıva 2020 Túrik álemi mádenıeti astanasy» baǵdarlamasy Hıvada ótti, dep habarlaıdy Túrkııa Radıo Televızııa portaly.

«Byltyr koronavırýs pandemııasy saldarynan keıinge qalǵan 2020 Túrik álemi mádenıeti astanasy baǵdarlamasynyń ashylý saltanatyna 500-ge tarta óner qaıratkeri qatysty. Ol Ózbekstannyń Hıva qalasyndaǵy tarıhı qamalda ótti. Rásimge baılanysty Hıva qalasy ashyq aýa qoıylym sahnasyna aınaldy. Óner qaıratkerleri Ishan qamalynyń barlyq kóshelerinde dástúrli mýzyka úlgilerin shyrqap, bı bıledi. Shara sheńberinde Túriksoı «Túrik álemi mádenıet astanasy» fotosýret kórmesin ashty. Kórmede túrik áleminiń bedeldi fotograftary túsirgen Mádenıet astanasy bolǵan qalalardyń sýretteri oryn aldy. Shara barysynda aıyryqsha Ózbekstannyń dástúrli kıim úlgilerin tanystyrǵan sán qoıylymy boldy», - dep jazady TRT.


Bizdiń kanalymyzǵa jazylyńyz:

Bólisińiz:

Avtor:

Baqytjol Kákesh

Sondaı-aq... oqyńyz
Pikir qaldyrý
+7
Jiberý
ONLAIN QYZMETKERLER
REDAKTOR
Janıbek Amangeldı
Janıbek Amangeldı
954-059

MURAǴAT